«Реал» ёзда 10 нафар футболчиси билан хайрлашмоқчи

«Реал» ёзда деярли ўн нафар футболчиси билан хайрлашишни режалаштирмоқда.

«Чемпионат» нашрининг Goal’га таяниб, хабар беришича, Гарет Бэйл, Иско ва Марсело мавсум сўнгида жамоани тарк этади. Футболчиларнинг мадридликлар билан шартномаси 1 июль куни ўз ниҳоясига етади ва катта эҳтимол билан уларга янги шартнома таклиф қилинмайди. Бу эса клубга 60 миллион евро тежаб қолиш имконини беради. Ушбу маблағ Килиан Мбаппе билан шартнома имзолашга мўлжалланган. Французнинг маоши 50 миллион евро бўлиши кўзда тутилган.

Шунингдек, «қаймоқранглилар» ёзда жамоани тубдан ўзгартириш мақсадида яна тўрт футболчи билан хайрлашишга таёр. Эден Азар, Лука Йович, Мариано Диас ва Хесус Вальехо ҳам катта эҳтимол билан кейинги мавсумни мадридликлар таркибида бошламайди. Азар ва Йович ижарага берилиши мумкин.

Яна икки нафар футболчи жамоани тарк этади. Булар Марко Асенсио ва Дани Себальос. Уларнинг шартномаси 2023 йилда тугайди, «Реал» уларнинг сотувидан даромад қилиш мақсадида шартнома муддати тугашидан аввал сотиб юбормоқчи.

«Қаймоқранглилар» Ла Лиганинг 2021/22 йилги мавсумида 29-турдан кейин 66 очко жамғарган ҳолда пешқадам бўлиб турибди.