“Real” yozda 10 nafar futbolchisi bilan xayrlashmoqchi

“Real” yozda deyarli o‘n nafar futbolchisi bilan xayrlashishni rejalashtirmoqda.

“Chempionat” nashrining Goal’ga tayanib, xabar berishicha, Garet Beyl, Isko va Marselo mavsum so‘ngida jamoani tark etadi. Futbolchilarning madridliklar bilan shartnomasi 1-iyul kuni o‘z nihoyasiga yetadi va katta ehtimol bilan ularga yangi shartnoma taklif qilinmaydi. Bu esa klubga 60 million yevro tejab qolish imkonini beradi. Ushbu mablag‘ Kilian Mbappe bilan shartnoma imzolashga mo‘ljallangan. Fransuzning maoshi 50 million yevro bo‘lishi ko‘zda tutilgan.

Shuningdek, “qaymoqranglilar” yozda jamoani tubdan o‘zgartirish maqsadida yana to‘rt futbolchi bilan xayrlashishga tayor. Eden Azar, Luka Yovich, Mariano Dias va Xesus Valyexo ham katta ehtimol bilan keyingi mavsumni madridliklar tarkibida boshlamaydi. Azar va Yovich ijaraga berilishi mumkin.

Yana ikki nafar futbolchi jamoani tark etadi. Bular Marko Asensio va Dani Sebalyos. Ularning shartnomasi 2023-yilda tugaydi, “Real” ularning sotuvidan daromad qilish maqsadida shartnoma muddati tugashidan avval sotib yubormoqchi.

“Qaymoqranglilar” La Liganing 2021/22-yilgi mavsumida 29-turdan keyin 66 ochko jamg‘argan holda peshqadam bo‘lib turibdi.