Лаутаро Мартинес ёзда «Интер»ни тарк этиши мумкин.
La Repubblica нашрининг хабарига кўра, ҳужумчига «Атлетико Мадрид» қизиқиш билдирмоқда. «Матрасчилар» бош мураббийи Диего Симеоне раҳбариятдан 24 ёшли футболчини жамоага олиб келишни сўраган. Раҳбарият мураббийнинг талабини бажаришга рози, аммо футболчи учун «Интер»га 60 миллион евро тўламоқчи эмас.
Шунингдек, Мартинеснинг ўзи ҳам жамоани тарк этиши мумкинлигини инкор қилмаган, чунки у «нераззурилар»нинг лойиҳасида ўзини асосий ўринларда кўрмаяпти.
«Интер» ҳам Лаутаронинг кетишига қарши эмас. Миланликлар «Ювентус» ҳужумчиси Пауло Дибала вариантини кўриб чиқмоқда. Бундан ташқари, «Сассуоло» ярим ҳимоячиси Давиде Фраттези ва ҳужумчи Жанлука Скамакка ҳам «Интер» нишонида бўлиб турибди.
Аввалроқ Мартинеснинг коронавирусга чалингани ва Аргентина терма жамоасининг март ойидаги ўйинларини ўтказиб юбориши ҳақида хабар берилганди.
Маълумот учун, Мартинес 2018 йилдан бери «Интер» шарафини ҳимоя қилиб келади. У 2021/22 йилги мавсумда барча мусобақаларда 39 ўйинда майдонга тушиб, ўз ҳисобига 16 та гол ва 2 та голли узатма ёздириб қўйди.
Изоҳ (0)