Япония Украинадаги вазият муносабати билан Россияга қарши янги санкциялар жорий қилмоқда. Бу ҳақда мамлакат Ташқи ишлар вазирлиги баёнотига таяниб, «Reuters» хабар берди.
Бу сафар Япония ҳукумати 25 нафар россиялик жисмоний шахснинг активларини музлатиб қўяди ва Россиянинг 81 ташкилотига маҳсулот экспорт қилишни тақиқлайди.
Агентлик маълумотларига кўра, санкциялар рўйхатига қуйидагилар киради: Миасс автомобиль заводи, Вимпел кемасозлик заводи, Амур кемасозлик заводи, «Байкал Электроникс» электроника ишлаб чиқарувчиси, «Стрела» ишлаб чиқариш мажмуаси, «Звезда» машинасозлик заводи ва бошқалар.
Бундан ташқари, бош вазир Фумио Кисида Япония Россияни савдодаги энг қулай давлат мақомидан маҳрум қилиш, унинг рақамли активлар ёрдамида молиявий санкцияларни четлаб ўтишга йўл қўймаслик чораларини кўришини айтди.
Аввалроқ Япония россияликларнинг капиталини музлатиб, Россия фуқароларига виза беришни тақиқлаган эди. Бундан ташқари, мамлакат расмийлари Беларусь ҳукуматининг юқори мартабали амалдорларига нисбатан санкциялар қўллаш масаласини кўриб чиқмоқда.
Канада ҳам Украинадаги уруш туфайли Россия федерация кенгашининг 160 нафар аъзосига қарши санкциялар жорий қилмоқда.
Россия 24 февралда Украина ҳудудида махсус ҳарбий операцияларни бошлаганидан кейин ЕИ, АҚШ, Буюк Британия, Канада, Япония, Жанубий Корея, Австралия ва бошқа давлатлар россиялик бизнесменлар, топ-менежерлар, сиёсатчилар ва амалдорларга нисбатан бир қатор тақиқ ҳамда чеклов пакетларини жорий этган.
Изоҳ (0)