Франция Туркия ҳамда Греция билан ҳамкорликда Мариуполдаги одамларни эвакуация қилиш юзасидан гуманитар операция ўтказишни режалаштирмоқда. Бу ҳақда Франция президенти Эммануэль Макрон маълум қилган, дея хабар берган «Коммерсантъ».
Франция президенти Россия давлат раҳбари билан мазкур масалани яқин орада маслаҳатлашиб олиши ҳақида гапирган.
«Президент Путин билан яқин орада гаплашиб оламан ва биз Туркия ҳамда Греция давлатлари билан ҳамкорликда Мариуполдаги одамларни бошқа хавфсиз жойга эвакуация қилиш юзасидан гуманитар операция имкониятлари ҳақида суҳбатлашамиз», — деган Макрон Брюсселда ўтган матбуот анжуманида (AFP).
Унинг сўзларига кўра, Путин билан муҳокамалар яқин 48-72 соат ичида бўлиб ўтади.
Франция давлат раҳбари Мариупол мэри ва Украина ҳукумати вакиллари билан бу борада музокаралар ўтказган. Макрон махсус гуманитар операцияга яна бошқа томонлар ҳам қўшилишига умид қилаётганини айтган.
Аввал Макрон ва Байден дунёда озиқ-овқат маҳсулотлари инқирози кузатилишидан огоҳлантиргани, Франция президенти «Биринчи канал» муҳаррири Марина Овсянниковага сиёсий бошпана беришга тайёрлигини билдиргани ҳақида хабарлар берилган.
Эслатиб ўтамиз, Россия 24 февралда Украинада махсус ҳарбий операцияларни бошлаган. Шундан кейин АҚШ, ЕИ, Буюк Британия, Австралия, Янги Зеландия, Япония, Канада ва бошқа давлатлар Россияга нисбатан санкциялар қўлланилганини эълон қилган.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)