Франция Атлантика океанига баллистик ракеталар билан жиҳозланган учта атом сувости кемасини жойлаштирди. Бу АҚШ ва СССР ўртасидаги совуқ уруш тугаганидан буён биринчи марта содир бўлмоқда, деб ёзади The Times.
Нашрнинг таъкидлашича, Франция президенти Эммануэль Макрон бу каби чораларни «Россия томонидан ядровий қурол таҳдидларига» қарши қўллаган.
Маълумотларга кўра, ҳар бир француз сувости кемаси бир неча минг километр масофага уча оладиган 16 та қитъалараро М51 ракеталарини ташийди. Аслида Франциянинг Атлантика океанидаги миссияси «навбатчилиги» 1972 йилда бошланган ва Францияга душман тарафнинг ҳужумига жавоб қайтаришга қаратилган.
Францияда ҳам ядровий қанотли ракеталар мавжуд бўлиб, улар ердаги аэродромлар ёки Шарль де Голль авиаташувчисидан учириладиган Rafale реактив самолётлари ёрдамида учирилиши мумкин.
2020 йилда Макрон Европа Иттифоқининг ядровий қуролга эга бўлмаган 26 та давлатида Франциянинг «ядровий соябони»ни татбиқ этишни таклиф қилганди. Ўшанда Макрон Францияда қарийб 300 та ядровий каллакча борлигини билдириб, бу «душман тарафга ўз мақсадига эришиш учун шантаж ва қўрқитишларни амалга оширишга имкон бермаслиги»ни айтган.
Аввалроқ Франция Аэрокосмик кучлари ядро қуролини олиб юришга қодир, янгиланган, ўрта масофага ўчувчи «ҳаво-ер» ракетасини (ASMPA) муваффақиятли синовдан ўтказганди.
Изоҳ (0)