АҚШ Россия разведка хизматлари ва ҳарбийларига товарлар етказ берадиган ҳамда хизмат кўрсатадиган Россия компанияларига қарши санкциялар қўллаш ниятида. Бу ҳақда The Washington Post газетаси хабар берди.
Нашр маълумотларига кўра, Вашингтоннинг янги санкцияларига учраши мумкин бўлган корхоналар қаторида ишлаб чиқариш ва ускуналарни етказиб беришга ихтисослашган «Сертал» компанияси, шунингдек, микроэлектроника соҳасида тадқиқотлар ва ўлчов асбобларини етказиб бериш билан шуғулланувчи «Серния инжиниринг» компанияси бор.
Нашр манбасининг таъкидлашича, санкцияга учраши кутилаётган корхоналарнинг аксарияти аввалроқ АҚШ Савдо вазирлиги томонидан «сезгир технологиялар»ни экспорт қилиш тақиқланган компаниялар рўйхатига киритилган.
WSJ маълумотларига кўра, янги санкциялар кейинги ҳафтанинг бошида эълон қилиниши кутилмоқда.
Аввал Европа иттифоқи Донецк ва Луганск халқ республикалари мустақиллигини тан олиш ҳақидаги келишувларни ратификация қилган Россия давлат думаси ва Федерация кенгаши вакилларига нисбатан санкциялар қўллаганди. Россия 24 февралда Украина ҳудудида махсус ҳарбий операцияларни бошлаганидан кейин ЕИ, АҚШ, Буюк Британия, Канада, Япония, Жанубий Корея, Австралия ва бошқа давлатлар россиялик бизнесменлар, топ-менежерлар, сиёсатчилар ва амалдорларга нисбатан бир қатор тақиқ ҳамда чеклов пакетларини жорий этган.
Изоҳ (0)