Россия Хавфсизлик кенгаши раиси ўринбосари Дмитрий Медведев Россия санкциялар қўллаган давлатлар «бозор иқтисодиётининг умумий асосларини рад этгани учун» шунга мос жавоб олишини маълум қилди. У Марказий банк ва молиявий ташкилотлар активларининг музлатилишини «қоидасиз уруш» деб атаб, бунинг оқибатлари жаҳон иқтисодий тартибининг йўқ қилинишига олиб келишини таъкидлаган, деб хабар беради «Коммерсантъ».
«Бу сайёрамизда, аввало Европа, АҚШ, юртимизда, сўнг XVIII аср охирлари XIX аср бошларида Осиё давлатларида шаклланган умумий иқтисодий қадриятларга ҳужумдир. Яъни бу бозор иқтисодиётининг умумий асосларини рад этишдир. Бу ерда нима дейиш мумкин: уларга қадрли бўлмаса, майли, буни амалга ошираверсин, бироқ маълум сабабларга кўра, табиийки, улар Россия томонидан шунга мос жавобни олади», — дейди Медведев.
Хавфсизлик кенгаши раиси ўринбосарининг ҳисоблашича, Россия «ҳеч кимдан умид қилмайди» ва ҳукумат авиасозлик, автомобилсозлик, микроэлектроника, IT-технология билан боғлиқ масалаларни ўзи ҳал этиши керак.
Дмитрий Медведев 1998 йилги дефолт қайтариладими, деган саволга «ўша вақтда мамлакат камроқ ҳимояланган эди», дея жавоб қайтарган. Унинг фикрича, «битта сувга икки марта тушиб кетиб бўлмайди».
Россия 24 февралда Украина ҳудудида махсус ҳарбий операцияларни бошлаганидан кейин ЕИ, АҚШ, Буюк Британия, Канада, Япония, Жанубий Корея, Австралия ва бошқа давлатлар россиялик бизнесменлар, топ-менежерлар, сиёсатчилар ва амалдорларга нисбатан бир қатор тақиқ ҳамда чеклов пакетларини жорий этган.
Изоҳ (0)