AQSH Rossiya razvedka xizmatlari va harbiylariga tovarlar yetkaz beradigan hamda xizmat ko‘rsatadigan Rossiya kompaniyalariga qarshi sanksiyalar qo‘llash niyatida. Bu haqda The Washington Post gazetasi xabar berdi.
Nashr ma’lumotlariga ko‘ra, Vashingtonning yangi sanksiyalariga uchrashi mumkin bo‘lgan korxonalar qatorida ishlab chiqarish va uskunalarni yetkazib berishga ixtisoslashgan “Sertal” kompaniyasi, shuningdek, mikroelektronika sohasida tadqiqotlar va o‘lchov asboblarini yetkazib berish bilan shug‘ullanuvchi “Serniya injiniring” kompaniyasi bor.
Nashr manbasining ta’kidlashicha, sanksiyaga uchrashi kutilayotgan korxonalarning aksariyati avvalroq AQSH Savdo vazirligi tomonidan “sezgir texnologiyalar”ni eksport qilish taqiqlangan kompaniyalar ro‘yxatiga kiritilgan.
WSJ ma’lumotlariga ko‘ra, yangi sanksiyalar keyingi haftaning boshida e’lon qilinishi kutilmoqda.
Avval Yevropa ittifoqi Donetsk va Lugansk xalq respublikalari mustaqilligini tan olish haqidagi kelishuvlarni ratifikatsiya qilgan Rossiya davlat dumasi va Federatsiya kengashi vakillariga nisbatan sanksiyalar qo‘llagandi. Rossiya 24-fevralda Ukraina hududida maxsus harbiy operatsiyalarni boshlaganidan keyin YI, AQSH, Buyuk Britaniya, Kanada, Yaponiya, Janubiy Koreya, Avstraliya va boshqa davlatlar rossiyalik biznesmenlar, top-menejerlar, siyosatchilar va amaldorlarga nisbatan bir qator taqiq hamda cheklov paketlarini joriy etgan.
Izoh (0)