Ўзбекистон олимлари импорт ўрнини босувчи қулупнайнинг «Тонг ифори» навини яратди. Бу ҳақда Қишлоқ хўжалиги вазирлиги хабар қилди.
Қайд этилишича, нав вазирлик тасарруфидаги Сабзавот, полиз экинлари ва картошкачилик илмий-тадқиқот институтида яратилган. «Тонг ифори» қулупнайи ички бозор ҳамда экспорт учун мўлжалланган.
Ўзбекистонда қулупнай етиштириш
Бугун республикамизда ушбу реза мевани йил бўйи очиқ майдонлар ҳамда иссиқхоналарда етиштириш учун барча зарур шароитлар мавжуд. Ушбу жараён Жанубий Корея ва Хитой давлатлари билан яқиндан ҳамкорлик асосида амалга ошириляпти ва шу тариқа ўзаро тажриба алмашиш кетмоқда.
Бугунги кунда мамлакатда жами 690 гектар майдонда (578 гектар аҳоли томорқа майдонлари, 112 гектар фермер хўжаликларида) ҳар йили ўртача 7 минг тоннадан ортиқ қулупнай етиштирилади. Тошкент, Наманган, Фарғона, Андижон, Самарқанд вилоятлари эса янги қулупнайни бозорларга етказиб бериш бўйича етакчи ҳудудлар ҳисобланади.
Сабзавот, полиз экинлари ва картошкачилик илмий-тадқиқот институтида қулупнайнинг янги серҳосил навларини яратиш бўйича фаол иш олиб борилмоқда. Илгари бозорда фақат хорижий етказиб берувчилардан чет эл валютаси ҳисобига харид қилинадиган юқори ҳосилдор импорт навлари бор эди. Қулупнайнинг «Тонг ифори» нави мазкур илмий-тадқиқот институти олимларининг изланишлари натижаси ҳисобланади. Ушбу нав кўчатларини Сабзавот, полиз экинлари ва картошкачилик илмий-тадқиқот институтидан харид қилиш мумкин.
Нав ҳақида маълумот
«Тонг ифори» нави иссиқхонада етиштиришга мослаштирилган. Ўсимликнинг ўсиш даври 193—200 кун, биринчи теримгача бўлган муддат мўътадил иқлим шароитида 107—115 кунни ташкил этади. Мевасининг ранги оч қизил, ҳар бирининг вазни 20—25 граммгача келади. Меваси таркибида қуруқ модда миқдори 10,8 фоиз (10,2—11,2), қанд 9,5 фоиз (7,2-7,8), аскорбин кислотаси 100 г маҳсулотда 66,98 (54,8—68,0) мг, нитрат миқдори 68 мг/кг. Ҳосилдорлик кўрсаткичи 1,8—2,2 кг/м2 дан иборат.
Бугунги кунда дунё миқёсида резавор мевалар етиштириш ҳажми йилига 7—8 миллион тонна бўлиб, шундан 4 миллион тоннага яқинини қулупнай ташкил қилади. Қулупнай (Фрагариа спп) етиштириш бўйича жаҳонда етакчилик қилиб, йилига 825 минг тонна ҳосил олинади. Испанияда 305 минг тонна, Японияда 209 минг тонна, Жанубий Кореяда 203 минг тонна қулупнай етиштирилади. Европада эса Польша ва Франция етакчилик қилиб, улар ҳар йили 100—180 минг тонна маҳсулот олади.
Изоҳ (0)