O‘zbek olimlari xitoylik hamkasblari bilan tibbiyotda qo‘llaniluvchi antiseptik vositasini ishlab chiqishning yangi usulini yaratdi, deb xabar beradi Fanlar akademiyasi matbuot xizmati.

Foto: “Daryo”

Qayd etilishicha, O‘zFA Genetika va o‘simliklar eksperimental biologiyasi instituti laboratoriya mudiri Baxtiyor Rasulov boshchiligidagi bir guruh olimlar xitoylik hamkasblari (Xitoy fizika-kimyo instituti) bilan hamkorlikda nanobiomateriallar olinib, ularning odamda turli kasalliklarni qo‘zg‘atuvchi patogen mikroorganizmlarga tez ta’sir etishi isbotlandi.

Ushbu ishlanmadan tibbiyotda (antiseptik vosita) va qishloq xo‘jaligida ekinlarning fitopatogen zamburug‘lariga qarshi kurashda foydalanish mumkin.

Bakteriya polisaxaridlariga nanozarralarini kiritish orqali yangi nanobiomateriallar olish borasida har ikki institut hamkorligida 2012-2018-yillar davomida qator ilmiy loyihalar bajarildi. Bakteriya polisaxaridlari boshqa vositalarga qaraganda inson tanasiga zararli ta’sir ko‘rsatmasligi sababli tarkibida nanozarralar saqlagan nanobiomateriallar olishda keng qo‘llanilmoqda. Ushbu loyihalar doirasida ham tadqiqotchilar aynan bakteriya biopolimerlaridan foydalanishdi.

Bunday turdagi nanobiomateriallarning yana bir muhim xususiyati ularning viruslarga qarshi tez va samarali ta’sir eta olishidir. Hozirda nanozarralarning viruslarga qarshi qo‘llashni tadqiq etish uchun loyiha muhokama qilinmoqda.