Шавкат Мирзиёевнинг фармойиши билан Ўзбекистон президентининг соғлиқни сақлаш соҳаси вакиллари билан «очиқ мулоқоти»да белгиланган вазифаларни амалга оширишга доир «йўл харитаси» тасдиқланди. Бу ҳақда Telegram’даги «Ҳуқуқий ахборот» канали хабар берди.
Йўл харитаси 7 та йўналишдан иборат бўлиб, унда, жумладан, қуйидагилар белгиланган:
- 2022 йилда 136 та ва 2023 йилда яна 140 та янги поликлиника фаолиятини йўлга қўйиш;
- 2023 йилдан жойлардаги поликлиника филиаллари негизида оилавий шифокор пунктларини ташкил этиш;
- Оилавий шифокор пунктлари, оилавий поликлиникалар ва кўп тармоқли марказий поликлиникаларда кундузги стационар иш вақтини соат 20:00 гача узайтириш. Уларда ишлайдиган шифокор ва ҳамширалар иш ҳақига қўшимча устама тўлашни йўлга қўйиш.
- барча туман (шаҳар) кўп тармоқли марказий поликлиникаларида болалар бўлимини ташкил этиш;
- тиббиёт бригадаларига 2022—2023 йилларда қўшимча 8 500 та ҳамшира ва доя штат бирликларини бериш;
- 18 ёшгача бўлган болаларни педиатр, стоматолог, эндокринолог, ортопед каби энг зарур мутахассислар томонидан манзилли кўрикдан ўтказиш тизимини жорий қилиш;
- тажрибали шифокорларнинг якка тартибда оилавий шифокорлик фаолиятини юритишига рухсат бериш;
- 3—15 ёшдаги болаларни 2022 йил 1 июлдан йод препарати билан бепул таъминлаш;
- янгидан ташкил этилаётган 46 та туманлараро перинатал марказларда чақалоқлар реанимацияси бўлими фаолиятини йўлга қўйиш.
- соғлиқни сақлаш тизими ходимларининг ойлик маошини малака тоифасига қараб қўшимча 15 фоизгача ошириш;
- юқори технологик мураккаб операцияларни бажарган шифокорларга қўшимча 25 фоиз миқдорида устама тўлашни жорий этиш.
- барча тиббиёт ходимлари учун дастлабки ва даврий касбий-тиббий кўрикни бепул ўтказиш;
- қон билан бевосита ишлаётган тиббиёт ходимларини гепатит «Б»га қарши бепул эмлаш.
- ҳудудларда шифокорларга бўлган ҳақиқий эҳтиёждан келиб чиқиб, тиббиёт ОТМда давлат грантлари асосида қабул квоталари мақсадли ошириб бориш;
- фтизиатрия, гематология, нефрология, пулмонология, психиатрия, шошилинч тиббий ёрдам, лаборатория иши, юқумли касалликлар каби 15 та тор соҳадаги мутахассислик бўйича магистратурага давлат грантларини 4 бараварга ошириш.
Бундан ташқари, олис ва чекка ҳудудларда узлуксиз 3 йил ишлаган шифокорларни клиник ординатурага тест синовларисиз қабул қилинади. Ўз маҳалласида соғлом турмуш тарзини тарғиб қилган, шахсий намуна кўрсатган тиббиёт ходимлари ва жамоатчилик вакиллариучун «Халқ саломатлиги посбони» кўкрак нишонини таъсис этилади.
Эслатиб ўтамиз, 18 март куни Тошкентдаги «Ўзбекистон» халқаро анжуманлар саройида Шавкат Мирзиёевнинг соғлиқни сақлаш соҳаси вакиллари билан «Ўзбекистон тиббиёти — инсон қадри учун» мавзусидаги очиқ мулоқоти бўлиб ўтди. Президент очиқ мулоқотга тайёргарлик жараёнида келиб тушган муаммоларнинг ечимлари ва бугунги таклифлар бўйича қисқа муддатда қарорлар қабул қилинишини таъкидлаганди.
Мулоқот давомида соғлиқни сақлаш тизимида ислоҳотлар давом эттирилиши қайд этилди. Давлат раҳбари ҳозирда соҳада трансформация жараёни кетаётганини айтди. Хусусан, Ўзбекистонда 1 апрелдан бошлаб чет элдан олиб кириладиган тиббий жиҳозлар ҚҚС ва божхона божидан озод қилиниши ва тез тиббий ёрдам тизимидаги барча Damas’лар 2025 йилгача замонавий автомобилларга алмаштирилиши таъкидланди. Бундан ташқари, Ўзбекистонда тиббиёт ходимларининг ойлик маоши камида 10 фоизга оширилиши, тиббиёт олийгоҳлари талабаларига шифокор бўлиб ишлашга рухсат берилиши маълум қилинди.
Изоҳ (0)