21 март куни Фарғона вилояти Қўқон шаҳар «Ҳазрати Аббос» масжиди имом-хатиби Саидкамолхон Маҳмудов ва унинг 4 нафар оила аъзоси ис газидан вафот этгани тўғрисида хабар берилганди. «Ҳудудгазтаъминот» ушбу хонадон газлаштирилгани сабаб воқеа жойига газ таъминоти ташкилоти мутахассислари ҳам етиб борганини маълум қилди.
Ўрганиш давомида автомобиль сақлаш жойида икки контурли иситиш қозони ўрнатилгани ва унинг тепасида ётоқхона жойлашгани маълум бўлган. Шу билан бирга, дудбўронда носозликлар аниқланган, хусусан, унинг яхлитлиги бузилган. Бу эса ис гази тўпланишига сабаб бўлиши мумкин бўлган.
Фавқулодда вазиятлар вазирлиги хабарига кўра, ҳозирда экспертиза ўтказилиб, ўлим сабаблари аниқланмоқда. Шунингдек, тергов ҳаракатлари ҳам олиб борилмоқда.
«18 февраль куни хонадондаги газ ускуналари профилактик кўрикдан ўтказилиб, хонадонда яшовчиларга ёнғин хавфсизлиги қоидалари бўйича тушунчалар берилган. Бу ҳақда махсус китобда қайд этилгани маълум қилинди», — дейилади хабарда.
Аввалроқ Самарқандда тўрт кишининг ис газидан заҳарланиб вафот этгани юзасидан жиноят иши қўзғатилгани, Хоразмдаги чойхонада бир оиланинг уч аъзоси ис газидан заҳарланиб вафот этгани, Каттақўрғонда ис газидан оилавий заҳарланиш оқибатида уч нафар бола ҳалок бўлгани тўғрисида хабар берилганди.
Изоҳ (0)