22 март куни кечқурун Татаристон президенти Рустам Минниханов ишчи ташриф билан Ўзбекистонга келди, деб хабар беради республика президенти матбуот хизмати.
Тошкент халқаро аэропортида уни Россиянинг Ўзбекистондаги элчиси Олег Малгинов ва Ўзбекистон бош вазир ўринбосари — инвестициялар ва ташқи савдо вазири Сардор Умурзоқов кутиб олган.
23 март куни Минниханов Ўзбекистон ҳукуматининг қатор вакиллари билан музокаралар ўтказиши керак. Минниханов мамлакатга ташрифи давомида Татаристоннинг «Химград» технополиси билан ҳамкорликда «Чирчиқ» кимё-индустриал технопаркини ташкил этилиши муносабати билан ўтказилаётган маросимда қурилишга тамал тошини қўяди.
Ўзбекистон президенти Шавкат Мирзиёев ва Татаристон президенти Рустам Миннихонов қарори билан «Ўзкимёсаноат» АЖ ҳамда «Химград» технополислари томонидан Тошкент вилоятининг Чирчиқ шаҳрида ишлаб чиқаришни маҳаллийлаштиришга мўлжалланган саноат парки ташкил этилмоқда.
Технопарк юқори қийматга эга бўлган, ташқи бозорда харидоргир ва импорт ўрнини босувчи маҳсулотлар ишлаб чиқаришни ташкил этиш учун хорижий ва маҳаллий инвестицияларни кенг жалб қилади. Технопаркнинг фаолият кўрсатиш муддати кейинчалик узайтириш имконияти билан 30 йилни ташкил этади.
Технопарк ҳудудида МИЗ учун белгиланган алоҳида солиқ, божхона ва валюта тартиботлари амал қилади. Бунда Солиқ кодекси ва «Махсус иқтисодий зоналар тўғрисида»ги қонунда белгиланган солиқ имтиёзлари, шунингдек, божхона тўловлари бўйича имтиёзлар технопарк иштирокчилари, дирекция ва бошқарув компанияси томонидан киритилган инвестициялар ҳажмидан қатъи назар, 10 йил муддатга берилади.
Технопарк иштирокчиларига Тадбиркорлик фаолиятини қўллаб-қувватлаш давлат жамғармаси томонидан инвестиция лойиҳаларини амалга ошириш доирасида, шу жумладан, айланма маблағларни тўлдириш учун бериладиган банк кредитлари суммасининг 50 фоизигача, бироқ 8 миллиард сўмдан кўп бўлмаган миқдорда кафилликлар, инвестиция лойиҳаларини амалга ошириш учун ажратиладиган кредитлар бўйича фоиз харажатларини қоплаш учун компенсациялар тақдим этилади.
Изоҳ (0)