Ижтимоий тармоқларда Қашқадарё вилоятида номаълум йиртқич ҳайвон маҳаллий аҳоли томонидан уриб ўлдирилгани тасвирланган видео тарқалди. Telegram’даги «Экологуз» канали ҳолат юзасидан маълумот бериб, ўлдирилган ҳайвон аслида тулки бўлганини маълум қилди.
Маълум қилинишича, Қамаши тумани Тўқбой қишлоғида «чупакабра» таёқ билан уриб ўлдирилгани айтилган видеотасвир туман ИИБ ҳамда Экология ва атроф муҳитни муҳофаза қилиш бошқармаси, шунингдек, маҳалла фаоллари иштирокида ўрганилган.
Ўрганиш давомида 19 март куни Қамаши тумани «Одоқжонбуз» МФЙ ҳудудидаги қишлоқ хўжалиги ер майдони суғориш ариғи қирғоқ қисмида бир бош тулки боласи жонсиз ўлик танаси ётгани аниқланган.
Ҳолат жойида юрган фуқарога видеотасвир кўрсатилиб, воқеа ҳақида сўралганда, у тулки боласи қўй-қўзиларни ҳуркитиб чиққан вақтида итлар тишлаб ўлдирганини билдирган.
«Тулки боласи қўтир касаллиги билан юнги тўкилиб кетгани, ўлик танасини атрофдаги фуқаролар ‘Чупакабра ҳайвонни ўлдирдик’, деб уни видеотасвирга олиб, ижтимоий тармоққа тарқатишганини маълум қилган», — дейилади хабарда.
Бундан олдин Касбида яшовчи аҳоли туман масъуллари инкор этган махлуқ ҳамон уларга зарар етказаётгани, масъуллар буни инкор этишдан нарига ўтмаётгани, Қашқадарёда аҳолининг қўй ва эчкиларини бўғизлаб кетаётгани айтилган номаълум ҳайвон одамлар томонидан уриб ўлдирилгани ҳамда Наманганда номаълум махлуқнинг скелети топилгани ҳақида хабар берилганди.
Изоҳ (0)