Наманганда шарқона янги йил — Наврўз айёми кўтаринки кайфият билан қарши олинди. Изғирин об-ҳаво ва вақти-вақти билан томчилаб турган ёмғир ҳам байрам кайфиятига халақит бергани йўқ. Вилоятдаги Наврўз тадбирларида иштирок этган «Дарё» мухбири Азизбек Абдувалиев бунга гувоҳ бўлди.
Вилоят маркази — Наманган шаҳридаги байрам тантаналари Заҳириддин Муҳаммад Бобур номли боғ ва «Афсоналар водийси» паркида нишонланди.
Эрта тонгдан бу манзилларга вилоятнинг турли ҳудудларидан минглаб наманганликлар кела бошлади.
Тадбирлар давомида миллий ўйинлар ва удумлар, спорт мусобақаларига кенг ўрин берилди. Йигитлар арқон тортиш, варрак учириш, курашда беллашган бўлса, қизлар баҳор гулларидан чамбарак тайёрлаш, дўппидўзлик, ўсма қўйиш ва жозибали рақсларни маромига етказди.
Наврўз айёмини сумалак ва паловсиз тасаввур этиб бўлмайди. Шу куни ўнлаб дошқозонларда сумалак қайнади, ошпазлар эса энг мазали ва байрамона безатилган палов тайёрлашда бир-бирларини ортда қолдиришга уринди.
Наманган вилояти ҳокими Шавкат Абдураззоқов, сектор раҳбарлари сумалак ва паловдан бажонидил тотиб кўрди.
Байрамда турли миллат вакиллари ҳам фаол қатнашди. Вилоятдаги қирғиз, тожик, рус ва корейс миллий маданий марказлари вакилларининг чиқишлари ҳеч кимни бефарқ қолдирмади.
Намангандаги байрам тадбирларида таниқли санъаткорлар, ёш ижрочилар, фолклор гуруҳлари, бадиий ҳаваскорлик жамоалари, дорбозлар истеъдодларини намойиш этди. Халқона куй-қўшиқлар, ўлан-лапарлар баралла жаранглади.
Наврўз айёмида фахрийлар, ногиронлиги бўлган инсонлар ва эҳтиёжманд оилаларни йўқлашга алоҳида эътибор берилди. Янги Наманган туманидаги президент ташриф буюрган «Бунёдкор» маҳалласида эса 10 нафар болакайнинг хатна тўйи ўтказилди ва шаҳзодалардек кийинтирилиб, совға-салом, тўёналар берилди.
Наманганда Наврўз байрамига бағишланган сайллар ва тадбирлар давом этмоқда.
Изоҳ (0)