Навоийда фуқаро ўрмон хўжалиги ҳудудидан ижарага олган 200 гектар ерини сотаётганида ушланди

Навоий ва Сурхондарё вилоятларида ер майдонларини ноқонуний сотмоқчи бўлган фирибгарлар ушланди, деб хабар бермоқда Иқтисодий жиноятларга қарши курашиш департаменти.

Қайд этилишича, Бош прокуратура ҳузуридаги департамент ҳамда Давлат хавфсизлик хизматининг Навоий вилояти бошқармалари томонидан тезкор тадбир ўтказилган. Унда фуқаро Р.А. ўзига ижара шартномасига асосан Томди давлат ўрмон хўжалиги ҳудудидан ажратилган 200 гектар чорвачиликка мўлжалланган яйлов ер майдонини фуқаро А.Т.га 250 миллион сўмга фирибгарлик йўли билан сотган вақтида ашёвий далиллар билан ушланган.

Бундан ташқари, департаментнинг Сурхондарё вилояти Бандихон туман бўлими томонидан ДХХнинг Сурхондарё вилояти бошқармаси билан ҳамкорликда тезкор тадбир ўтказилган. Унда Жарқўрғон тумани ирригация бўлими ходими Х.А. фуқаро У.га туман ҳокимлиги захирасидаги 15 сотих ер майдонини 60 миллион сўмга сотган вақтида ашёвий далиллар билан қўлга олинган.

Шунингдек, департамент ҳамда ДХХнинг Сурхондарё вилояти Шўрчи тумани бўлимлари томонидан тадбиркорлик субъектларининг ҳуқуқларини ҳимоя қилиш юзасидан тезкор тадбир ўтказилган. Унда У.Э. исмли фуқаро Б.B. хусусий корхонаси раҳбари Б.га ўзини туман ҳокимлиги ходими сифатида таништириб, унга аукцион савдоларисиз тадбиркорлик фаолиятини амалга ошириш учун саноат зонасидан 5 сотих ер майдони олиб беришини айтгани аниқланган. У хизмати эвазига 1 минг 200 доллари эвазига сўраб, шундан 500 долларини олган вақтида ашёвий далиллар билан ушланган.

Ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилган. Ҳозирда тергов ҳаракатлари ўтказилмоқда.