Самарқандда ИИБ ходимларининг хизмат фаолиятига қаршилик кўрсатиб, уларнинг қонуний талабини бажармаган спортчилар қамоққа олинди. Бу ҳақда «Дарё»га вилоят ИИБ ахборот хизмати маълум қилди.
Ҳолат вилоят ИИБ ЖҚБ уюшган жиноятчиликка қарши кураш бўлими ҳамда ДХХ ходимлари ҳамкорлигидаги профилактик тадбирлар давомида фош этилган.
Ўтказилган тадбирлар вақтида 7 та спорт мажмуасида ёшларни спорт билан шуғуллантираётган мураббийларнинг сертификати йўқлиги, машғулот олиб бораётганларнинг рўйхатга олиш тизими ташкил этилмагани аниқланган. Шунингдек, мураббий ва спортчиларнинг соғлиги ҳақида маълумотлар йўқлиги, санитария-гигиена талабларига жавоб бермаслиги, биринчи ёрдам ва тиббиёт бурчаги мавжуд эмаслиги аниқланган.
«10 та спорт мажмуасида рухсатномасиз сотиб келинаётган 72 килограмм протеин ва кучли таъсир этувчи дори воситалари ҳужжатлаштириб олинган. 16 нафар спортчи эса ИИБ ходимлари хизмат фаолиятига фаол қаршилик қилгани учун қамоққа олинган. Спорт заллари ва клубларда аниқланган камчиликлар бартараф этилгунга қадар уларнинг фаолияти тўхтатилган. Клуб эгалари билан профилактик суҳбатлар ўтказилиб, жиноят содир этмаслик тўғрисида расман огоҳлантирилган», — дейилади вилоят ИИБ ахборот хизмати хабарида.
Изоҳ (0)