Samarqandda IIB xodimlarining xizmat faoliyatiga qarshilik ko‘rsatib, ularning qonuniy talabini bajarmagan sportchilar qamoqqa olindi. Bu haqda “Daryo”ga viloyat IIB axborot xizmati ma’lum qildi.
Holat viloyat IIB JQB uyushgan jinoyatchilikka qarshi kurash bo‘limi hamda DXX xodimlari hamkorligidagi profilaktik tadbirlar davomida fosh etilgan.
O‘tkazilgan tadbirlar vaqtida 7 ta sport majmuasida yoshlarni sport bilan shug‘ullantirayotgan murabbiylarning sertifikati yo‘qligi, mashg‘ulot olib borayotganlarning ro‘yxatga olish tizimi tashkil etilmagani aniqlangan. Shuningdek, murabbiy va sportchilarning sog‘ligi haqida ma’lumotlar yo‘qligi, sanitariya-gigiyena talablariga javob bermasligi, birinchi yordam va tibbiyot burchagi mavjud emasligi aniqlangan.
“10 ta sport majmuasida ruxsatnomasiz sotib kelinayotgan 72 kilogramm protein va kuchli ta’sir etuvchi dori vositalari hujjatlashtirib olingan. 16 nafar sportchi esa IIB xodimlari xizmat faoliyatiga faol qarshilik qilgani uchun qamoqqa olingan. Sport zallari va klublarda aniqlangan kamchiliklar bartaraf etilgunga qadar ularning faoliyati to‘xtatilgan. Klub egalari bilan profilaktik suhbatlar o‘tkazilib, jinoyat sodir etmaslik to‘g‘risida rasman ogohlantirilgan”, — deyiladi viloyat IIB axborot xizmati xabarida.
Izoh (0)