«Президент мулоқот давомида муаммоларни бизга нисбатан яхшироқ билиши аниқ кўринди» — Беҳзод Мусаев ва Нурмат Отабеков давлат раҳбарининг тиббиёт ходимлари билан учрашуви ҳақида

Тошкентдаги «Ўзбекистон» халқаро анжуманлар саройида Шавкат Мирзиёевнинг соғлиқни сақлаш соҳаси вакиллари билан «Ўзбекистон тиббиёти — инсон қадри учун» мавзусидаги очиқ мулоқоти бўлиб ўтди. Президент очиқ мулоқотга тайёргарлик жараёнида келиб тушган муаммоларнинг ечимлари ва бугунги таклифлар бўйича қисқа муддатда қарорлар қабул қилинишини таъкидлади.

Мулоқот давомида соғлиқни сақлаш тизимида ислоҳотлар давом эттирилиши қайд этилди. Давлат раҳбари ҳозирда соҳада трансформация жараёни кетаётганини айтди.

«Дарё» мухбири ушбу тадбирдан сўнг соғлиқни сақлаш вазири Беҳзод Мусаев ҳамда Санитария-эпидемиологик осойишталик ва жамоат саломатлиги хизмати бошлиғи ўринбосари Нурмат Отабеков билан суҳбатлашди.

Табиийки, давлат раҳбарининг ўзлари қарс икки қўлдан чиқади, деб айтганларидек, тиббиёт ходимларининг олдида ҳам жуда катта масъулиятли вазифалар қўйилди. Лекин эшитилган сўзлар, рағбатлантирилган гаплардан сўнг бизнинг тизим ходимлари президент томонидан қўйилган вазифаларни, албатта, амалга оширишади. Шу билан бир қаторда, мазкур мулоқотда тиббиёт тизимининг барча бўғинидаги вакиллар қатнашишди. Хусусан, оддий ҳамширадан тортиб, ўрта тиббиёт ходими, шифокор, бош шифокор, бундан ташқари, хусусий тиббиёт марказлари ходимларигача иштирок этишди. Хусусий тиббиёт марказлари учун дунёда йўқ бўлган нарса — ўзларини ривожлантириш учун тиббий техника олиб келинганда божхона тўловларидан озод қилиш бўйича топшириқ берилди.

Мулоқотдан сўнг кўп хусусий клиникалар раҳбарларини кўриб гаплашсам, улар кўтаринки руҳда бу ердан чиқиб кетишяпти. Айрим ҳудудлар вакиллари гапиришга ҳам улгурмади, уларнинг армонда қолиб кетганларини ўзим ҳис қилиб турибман. Ўйлайманки, ҳар бир масалани «йўл харитаси»га, бўлажак қарор ва фармонларга киритиб борамиз.

Президент шифокорлардан ҳалолликдан ташқари мажбурият талаб қилдилар. Аҳолини соғлом турмуш тарзига тарғибот қилиш, унинг кўрсаткичларини белгилаш ва яхши натижага эришган шифокорга «Халқ саломатлиги посбони» кўкрак нишонини чиқаришни топширдилар. Соғлом турмуш тарзига амал қилган инсон келажакда тиббиёт муассасасига мурожаат қилишга эҳтиёжи ҳам бўлмайди.

Ушбу мулоқотнинг асосий мақсади — инсон қадри учун тиббиёт хизмат қилишидан иборат. Мулоқот инсонларнинг, беморларнинг розилигига эришиш, шунингдек, сифатли тиббиёт хизмати республиканинг ҳар бир қатламига етиб боришдан иборат бўлди.

Беҳзод Мусаев, соғлиқни сақлаш вазири

Биз эндиликда тиббиёт ходимларининг кўкрагига шамол теггандек ҳис қиляпмиз. Боиси тиббиёт ходимларининг дардини эшитишни ҳамма президентлар ҳам ўз зиммасига олмаган. Президентнинг маърузаларига эътибор қаратсак, тиббиётнинг барча соҳаларини қамраб олган. Барча соҳалар жуда чуқур таҳлил қилиб берилди. Давлат раҳбарининг маърузасида нафақат эришилган ютуқлар, балки ҳали олдимизда турган вазифалар, энг асосий мезон бўлиб ҳисобланадиган — халқимизни рози қилишдек вазифа олдимизда турганини алоҳида айтиб ўтди. Энг қизиғи, тиббиёт ходимлари билан мулоқот қилиш баробарида, мен яна бир жиҳатдан қувониб кетдимки, президентимиз тиббиётни мукаммал билганлари, қолаверса, тиббиёт ходимлари беролмаган саволнинг барча жиҳатларини очиб берганлари, мулоқот давомида муаммоларни бизга нисбатан яхшироқ билишлари аниқ кўринди.

Президентимиз таъкидлаганларидек, 52 фоиз саломатлик индекси соғлом турмуш тарзига боғлиқ экан. Демак, биз тиббиётнинг елкасидаги юкни 50 фоизга қисқартиришимиз, давлатнинг зиммасидаги юкни қисқартириш имкониятга эгамиз. Ўйлайманки, тайёрланадиган дастурларда тиббиётнинг профилактик йўналишига, бизнинг турмуш тарзимизга боғлиқ жиҳатларига алоҳида эътибор қаратилади.

Энг оғир вазифа бу — кимнидир рози қилиш. Айниқса, йиллар давомида норозичилик кайфияти шаклланиб қолган бўлса уни енгиб ўтиб, розилик тарафга тарози палласини босиш ҳамиша қийин бўлган.

Нурмат Отабеков, Санитария-эпидемиологик осойишталик ва жамоат саломатлиги хизмати бошлиғи ўринбосари