“Prezident muloqot davomida muammolarni bizga nisbatan yaxshiroq bilishi aniq ko‘rindi” — Behzod Musayev va Nurmat Otabekov davlat rahbarining tibbiyot xodimlari bilan uchrashuvi haqida

Toshkentdagi “O‘zbekiston” xalqaro anjumanlar saroyida Shavkat Mirziyoyevning sog‘liqni saqlash sohasi vakillari bilan “O‘zbekiston tibbiyoti — inson qadri uchun” mavzusidagi ochiq muloqoti bo‘lib o‘tdi. Prezident ochiq muloqotga tayyorgarlik jarayonida kelib tushgan muammolarning yechimlari va bugungi takliflar bo‘yicha qisqa muddatda qarorlar qabul qilinishini ta’kidladi.

Muloqot davomida sog‘liqni saqlash tizimida islohotlar davom ettirilishi qayd etildi. Davlat rahbari hozirda sohada transformatsiya jarayoni ketayotganini aytdi.

“Daryo” muxbiri ushbu tadbirdan so‘ng sog‘liqni saqlash vaziri Behzod Musayev hamda Sanitariya-epidemiologik osoyishtalik va jamoat salomatligi xizmati boshlig‘i o‘rinbosari Nurmat Otabekov bilan suhbatlashdi.

Tabiiyki, davlat rahbarining o‘zlari qars ikki qo‘ldan chiqadi, deb aytganlaridek, tibbiyot xodimlarining oldida ham juda katta mas’uliyatli vazifalar qo‘yildi. Lekin eshitilgan so‘zlar, rag‘batlantirilgan gaplardan so‘ng bizning tizim xodimlari prezident tomonidan qo‘yilgan vazifalarni, albatta, amalga oshirishadi. Shu bilan bir qatorda, mazkur muloqotda tibbiyot tizimining barcha bo‘g‘inidagi vakillar qatnashishdi. Xususan, oddiy hamshiradan tortib, o‘rta tibbiyot xodimi, shifokor, bosh shifokor, bundan tashqari, xususiy tibbiyot markazlari xodimlarigacha ishtirok etishdi. Xususiy tibbiyot markazlari uchun dunyoda yo‘q bo‘lgan narsa — o‘zlarini rivojlantirish uchun tibbiy texnika olib kelinganda bojxona to‘lovlaridan ozod qilish bo‘yicha topshiriq berildi.

Muloqotdan so‘ng ko‘p xususiy klinikalar rahbarlarini ko‘rib gaplashsam, ular ko‘tarinki ruhda bu yerdan chiqib ketishyapti. Ayrim hududlar vakillari gapirishga ham ulgurmadi, ularning armonda qolib ketganlarini o‘zim his qilib turibman. O‘ylaymanki, har bir masalani “yo‘l xaritasi”ga, bo‘lajak qaror va farmonlarga kiritib boramiz.

Prezident shifokorlardan halollikdan tashqari majburiyat talab qildilar. Aholini sog‘lom turmush tarziga targ‘ibot qilish, uning ko‘rsatkichlarini belgilash va yaxshi natijaga erishgan shifokorga “Xalq salomatligi posboni” ko‘krak nishonini chiqarishni topshirdilar. Sog‘lom turmush tarziga amal qilgan inson kelajakda tibbiyot muassasasiga murojaat qilishga ehtiyoji ham bo‘lmaydi.

Ushbu muloqotning asosiy maqsadi — inson qadri uchun tibbiyot xizmat qilishidan iborat. Muloqot insonlarning, bemorlarning roziligiga erishish, shuningdek, sifatli tibbiyot xizmati respublikaning har bir qatlamiga yetib borishdan iborat bo‘ldi.

Behzod Musayev, sog‘liqni saqlash vaziri

Biz endilikda tibbiyot xodimlarining ko‘kragiga shamol teggandek his qilyapmiz. Boisi tibbiyot xodimlarining dardini eshitishni hamma prezidentlar ham o‘z zimmasiga olmagan. Prezidentning ma’ruzalariga e’tibor qaratsak, tibbiyotning barcha sohalarini qamrab olgan. Barcha sohalar juda chuqur tahlil qilib berildi. Davlat rahbarining ma’ruzasida nafaqat erishilgan yutuqlar, balki hali oldimizda turgan vazifalar, eng asosiy mezon bo‘lib hisoblanadigan — xalqimizni rozi qilishdek vazifa oldimizda turganini alohida aytib o‘tdi. Eng qizig‘i, tibbiyot xodimlari bilan muloqot qilish barobarida, men yana bir jihatdan quvonib ketdimki, prezidentimiz tibbiyotni mukammal bilganlari, qolaversa, tibbiyot xodimlari berolmagan savolning barcha jihatlarini ochib berganlari, muloqot davomida muammolarni bizga nisbatan yaxshiroq bilishlari aniq ko‘rindi.

Prezidentimiz ta’kidlaganlaridek, 52 foiz salomatlik indeksi sog‘lom turmush tarziga bog‘liq ekan. Demak, biz tibbiyotning yelkasidagi yukni 50 foizga qisqartirishimiz, davlatning zimmasidagi yukni qisqartirish imkoniyatga egamiz. O‘ylaymanki, tayyorlanadigan dasturlarda tibbiyotning profilaktik yo‘nalishiga, bizning turmush tarzimizga bog‘liq jihatlariga alohida e’tibor qaratiladi.

Eng og‘ir vazifa bu — kimnidir rozi qilish. Ayniqsa, yillar davomida norozichilik kayfiyati shakllanib qolgan bo‘lsa uni yengib o‘tib, rozilik tarafga tarozi pallasini bosish hamisha qiyin bo‘lgan.

Nurmat Otabekov, Sanitariya-epidemiologik osoyishtalik va jamoat salomatligi xizmati boshlig‘i o‘rinbosari