Тошкентдаги «Ўзбекистон» халқаро анжуманлар саройида Шавкат Мирзиёевнинг соғлиқни сақлаш соҳаси вакиллари билан «Ўзбекистон тиббиёти — инсон қадри учун» мавзусидаги очиқ мулоқоти бўлиб ўтаётгани тўғрисида хабар берилганди. «Дарё» мухбирининг маълум қилишича, мулоқотда давлат раҳбари тиббий суғурта шаклларини ривожлантириш масаласига тўхталиб ўтган.
«Ҳаммамизга маълумки, бугунги кунда инсон ва унинг қонуний манфаатлари ҳамда конституциявий ҳуқуқлари Ўзбекистонда амалга оширилаётган кенг кўламли ва изчил ислоҳотларнинг марказига қўйилмоқда. Инсон, унинг ҳаёти, эркинлиги, шаъни, қадр-қиммати ва бошқа дахлсиз ҳуқуқлари жамиятимизда олий қадрият ҳисобланади. Амалдаги Конституциянинг 40-моддасида ‘Ҳар бир киши малакали тиббий хизматдан фойдаланиш ҳуқуқига эга’, деб белгилаб қўйилган. Ишончим комил, биз халқимиз соғлиғини сақлаш соҳасида улкан мақсад ва вазифаларни олдимизга қўяётган ҳозирги шароитда, ушбу конституциявий модданинг ўзи етарли эмас», — дейди президент.
Шавкат Мирзиёев «бугун замон биздан тиббиёт тизимининг конституциявий асосларини янада мустаҳкамлашни талаб этаётганини» таъкидлаган.
«Шунинг учун асосий қонунимизда миллий соғлиқни сақлаш тизимини аҳоли саломатлигини сифат жиҳатидан яхшилашга хизмат қиладиган юксак малакали замонавий соҳага айлантириш масаласи ҳам, ҳеч шубҳасиз, тўғридан-тўғри амал қиладиган конституциявий қоида сифатида ўз ифодасини топиши зарур. Аминманки, Ўзбекистон фуқаролари қонунда, энг аввало, Конституцияда белгилаб қўйилган кафолатли тиббий ёрдам турларидан бепул фойдаланиш ҳуқуқига эга. Шу мақсадда, биз турли тиббий суғурта шаклларини ривожлантириш учун конституциявий асос яратишимиз керак», — дея қўшимча қилади давлат раҳбари.
«Чунки соф ва тоза экологиясиз аҳоли соғлиғи ва миллат генофондини сақлаш ҳақида сўз юритишдан маъно йўқ. Бу ҳақда гапирганда, мен аввало, бугунги кунда салбий экологик таъсирдан зарар кўраётган Оролбўйи минтақаси ҳақида ўйлайман. Айни вақтда экология соҳасидаги ҳуқуқ бузилишлари оқибатида, фуқаролар соғлиғига етказилган зарарни қоплаб бериш мажбуриятини, давлат ўз зиммасига олиши керак. Бу ҳам Бош қомусимизда аниқ-равшан белгиланиши зарур. Шу билан бирга, Конституцияда тиббиёт ходимларининг юксак мақомини таъминлайдиган қоидани ҳам, муҳрлаб қўйишимиз лозим», — дейди Шавкат Мирзиёев.
Изоҳ (0)