Тошкентдаги «Ўзбекистон» халқаро анжуманлар саройида Шавкат Мирзиёевнинг соғлиқни сақлаш соҳаси вакиллари билан «Ўзбекистон тиббиёти — инсон қадри учун» мавзусидаги очиқ мулоқоти бўлиб ўтмоқда, деб хабар бермоқда «Дарё» мухбири.
«Нима учун бу мулоқот чўзилди? Бизга келиб тушган мурожаатларнинг 60 фоизи шахсий саволлар. Нима учун бу учрашув чўзилди? 85 фоиз муаммоларни йўллаган фуқаролар билан биз гаплашдик, ҳал қилдик. Албатта, ҳамманинг ҳам саволини бирданига ҳал қилолмаймиз. Билим билан, вақт билан ечилади», — дейди Шавкат Мирзиёев.
Президент, бугун ойлик маош ҳақида гаплашилишини ҳам маълум қилди.
«Хусусий тиббиётга, поликлиникаларга енгиллик бергани учун ҳам уларнинг сони, хизмат сифати ошди. Бу ерда давлат шифохоналари раҳбарлари билан хусусий тиббиёт вакиллари ҳам ўтирибди. Уларнинг ўртасида фарқ борми? Албатта, бор. Давлат шифохоналарида ишлайдиган ходимлар ‘хусусий шифохонада ойлик каттада’ дейишади», — дея қўшимча қилди президент.
«Оддий ҳамшира ойига 1—1,5 миллион ойлик олса-ю, лекин йилига икки марта тиббий кўрикка пул тўласа? Бу тизим бўлмайди. Сизлар ҳозир бу йиғилишда нима бўларкан деб ўтирибсизлар. Бир нарсани тушунайлик, агар биз бир-биримизни тўғри тушунмасак ҳеч нарса ўзгармайди. Халқимиз орасида ‘қилса бўлар экан-ку’, деган фикр уйғонди. Ушбу йиғилишдан кейин тиббиёт соҳасида ҳам шундай фикр уйғонса яхши бўлар эди», — дейди президент.
«Ўзбекистон тиббиёти — инсон қадри учун» мавзусидаги очиқ мулоқотга тайёргарлик доирасида тиббиёт ходимлари ва аҳолидан 25 мингдан ортиқ мурожаат ва таклифлар келиб тушган. Давлат раҳбарининг маърузаси «Ўзбекистон» ва «Ўзбекистон 24» (ўзбек тилида, шунингдек, сурдотаржимон билан), «Тошкент» ва «Ёшлар» (рус тилида), «Дунё бўйлаб» (инглиз тилида) телеканалларида жонли тарзда эфирга узатилмоқда.
Изоҳ (0)