Toshkentdagi “O‘zbekiston” xalqaro anjumanlar saroyida Shavkat Mirziyoyevning sog‘liqni saqlash sohasi vakillari bilan “O‘zbekiston tibbiyoti — inson qadri uchun” mavzusidagi ochiq muloqoti bo‘lib o‘tayotgani to‘g‘risida xabar berilgandi. “Daryo” muxbirining ma’lum qilishicha, muloqotda davlat rahbari tibbiy sug‘urta shakllarini rivojlantirish masalasiga to‘xtalib o‘tgan.
“Hammamizga ma’lumki, bugungi kunda inson va uning qonuniy manfaatlari hamda konstitutsiyaviy huquqlari O‘zbekistonda amalga oshirilayotgan keng ko‘lamli va izchil islohotlarning markaziga qo‘yilmoqda. Inson, uning hayoti, erkinligi, sha’ni, qadr-qimmati va boshqa daxlsiz huquqlari jamiyatimizda oliy qadriyat hisoblanadi. Amaldagi Konstitutsiyaning 40-moddasida ‘Har bir kishi malakali tibbiy xizmatdan foydalanish huquqiga ega’, deb belgilab qo‘yilgan. Ishonchim komil, biz xalqimiz sog‘lig‘ini saqlash sohasida ulkan maqsad va vazifalarni oldimizga qo‘yayotgan hozirgi sharoitda, ushbu konstitutsiyaviy moddaning o‘zi yetarli emas”, — deydi prezident.
Shavkat Mirziyoyev “bugun zamon bizdan tibbiyot tizimining konstitutsiyaviy asoslarini yanada mustahkamlashni talab etayotganini” ta’kidlagan.
“Shuning uchun asosiy qonunimizda milliy sog‘liqni saqlash tizimini aholi salomatligini sifat jihatidan yaxshilashga xizmat qiladigan yuksak malakali zamonaviy sohaga aylantirish masalasi ham, hech shubhasiz, to‘g‘ridan to‘g‘ri amal qiladigan konstitutsiyaviy qoida sifatida o‘z ifodasini topishi zarur. Aminmanki, O‘zbekiston fuqarolari qonunda, eng avvalo, Konstitutsiyada belgilab qo‘yilgan kafolatli tibbiy yordam turlaridan bepul foydalanish huquqiga ega. Shu maqsadda, biz turli tibbiy sug‘urta shakllarini rivojlantirish uchun konstitutsiyaviy asos yaratishimiz kerak”, — deya qo‘shimcha qiladi davlat rahbari.
“Chunki sof va toza ekologiyasiz aholi sog‘lig‘i va millat genofondini saqlash haqida so‘z yuritishdan ma’no yo‘q. Bu haqda gapirganda, men avvalo, bugungi kunda salbiy ekologik ta’sirdan zarar ko‘rayotgan Orolbo‘yi mintaqasi haqida o‘ylayman. Ayni vaqtda ekologiya sohasidagi huquq buzilishlari oqibatida, fuqarolar sog‘lig‘iga yetkazilgan zararni qoplab berish majburiyatini, davlat o‘z zimmasiga olishi kerak. Bu ham Bosh qomusimizda aniq-ravshan belgilanishi zarur. Shu bilan birga, Konstitutsiyada tibbiyot xodimlarining yuksak maqomini ta’minlaydigan qoidani ham, muhrlab qo‘yishimiz lozim”, — deydi Shavkat Mirziyoyev.
Izoh (0)