Маданият вазирлиги ҳузуридаги Маданият ва санъатни ривожлантириш жамғармаси ташаббуси билан саҳналаштирилган «Лазги — муҳаббат ва қалб рақси» балет спектакли 15—16 март кунлари томошабинларга тақдим этилди.
«Дарё» мухбирининг хабар беришича, Алишер Навоий номидаги давлат академик катта театрида намойиш этилган спектакль немис балетмейстери Раймондо Ребек томонидан саҳналаштирилган.
Маданият ва санъатни ривожлантириш жамғармаси Стратегик бошқарма бошлиғи Элмурод Нажимовнинг таъкидлашича, ушбу лойиҳани яратиш жараёни 2019 йилда бошланган бўлиб, икки йил давомида ишлар олиб борилган.
«Германиялик хореограф Раймондо Ребек ўз жамоаси билан Ўзбекистонга бир неча маротаба ташриф буюриб, «Лазги» тарихини ўрганди, лойиҳа устида жиддий ишлади. Лойиҳага таниқли ўзбек балетмейстери, Ўзбекистон халқ артисти Гавҳар Матёқубова ҳам маслаҳатчи сифатида жалб этилди.
Ушбу лойиҳанинг ўзига хослиги шундаки, уни бир қанча давлат ижодкорлари ҳамкорликда яратди. Масалан, Германиядан хореограф, Япониядан стенограф, Англиядан овоз ва ёруғлик ускуналари олиб келинди, Алишер Навоий номидаги давлат академик катта театри балет труппаси ва раққосалари роллар ижро этди.
2021 йилнинг сентябрь ойида шу театрда ушбу миллий балет постановкасининг премьераси бўлиб ўтди. Шундан сўнг ноябрда Дубай шаҳрида ўтказилган «Экспо—2020» бутунжаҳон кўргазмаси доирасида Dubai Opera саҳнасида халқаро премьера қилинди. «Лазги — муҳаббат ва қалб рақси» Бирлашган Араб Амирликлари ҳукумати вакиллари томонидан илиқ кутиб олинди. Ушбу постановкада миллий ва замонавий санъатимиз уйғунлашгани боис ҳам томошабинларга манзур бўлгани шубҳасиз», — дейди жамғарма расмийси.
Ўзбекистон халқ артисти Гавҳар Матёқубованинг фикрича, мазкур балет томошаси мамлакат анъаналарини жаҳон маданий ареналарида ёйишга хизмат қилади.
«Ўзбек санъати жуда ҳам ранг-баранг. Юртимиз мақомлари, бахшилари, миллий рақслари билан аллақачон дунёга танилган. Ҳозир ёшим 75 да, 61 йилдан буён санъат оламидаман. Лазги рақси уч минг йилдан ортиқ тарихга эга бўлиб, 2019 йилда ЮНЕСКО инсониятнинг номоддий маданий мероси рўйхатига киритган. Ўзбек миллатининг биринчи балети «Лазги» орқали яратилганидан ва мазкур лойиҳада қатнашганимдан чексиз хурсандман.
Ушбу лойиҳа ташкилотчилари бўлган Маданият ва санъатни ривожлантириш жамғармаси раҳбариятига, Саидахонга санъаткорлар номидан раҳмат айтаман», — дейди Гавҳар Матёқубова.
Спектакльдан сўнг ғоя муаллифи, Ўзбекистон Республикаси Маданият ва санъатни ривожлантириш жамғармаси кенгаши раиси ўринбосари Саида Мирзиёева ижодий жамоа билан учрашиб, ажойиб намойиш учун миннатдорлик билдирди.
«Миллий балет санъатининг дурдона асари бўлган «Лазги — муҳаббат ва қалб рақси» ўзбек балет санъатининг жаҳон миқёсига чиқишида ишончли қадамидир.
Мақсадимиз — маҳорат ва истеъдодимиз ила жаҳон балет мактаблари қаторида муносиб ўрин эгаллаш, биз бунга албатта эришамиз. Негаки ватан маданий меросини жаҳон ҳамжамиятига кўрсатиш истагимиз кучли.
Ушбу бетакрор спектаклни саҳналаштириш устида ишлаган бутун жамоага яна бир бор чин қалбдан миннатдорчилик билдираман», — дейди Саида Мирзиёева.
Лойиҳанинг тўлиқ вариантини «Дарё»нинг YouTube’даги саҳифаси орқали томоша қилишингиз мумкин.
Миролим Исажонов
Тасвирчи ва монтажчи: Илҳом Хурсаналиев
Изоҳ (0)