Ўзбекистонда бир нечта банкларда 18 март куни доллар курси кескин юқорилагандан кейин тушишни бошлади.
Аксарият банклар 1 АҚШ долларини 11 500 сўмдан сотиб олишни, 11 570 сўмдан сотишни таклиф қилмоқда. Бир кун аввал бу кўрсаткич мос равишда 11 520 ва 11 630 сўм эди.
Бундан ташқари, Марказий банк томонидан расмий курс охирги ҳафта ичида биринчи марта тушиб 11 509 сўмни ташкил қилди.
Марказий банк нима қилди?
Йил бошидан бери сўм АҚШ долларига нисбатан 6,8 фоизга қадрсизланди. Шу муносабат билан, Марказий банк ички валюта бозоридаги интервенсия ҳажмини оширди.
Ушбу операциялар «нейтраллик тамойиллари» асосида амалга оширилади – яъни олтин-валюта захиралари ҳисобига эмас, балки ўтган йили жамғарилган қўшимча захиралар ҳисобига.
Бундан ташқари, банк тизимини зарурий ликвидлик билан таъминлаш мақсадида банкларга Марказий банк томонидан қисқа муддатли ликвидлик (репо ва своп операциялари орқали) тақдим этиб борилади.
Марказий банк томонидан муомалага чиқариладиган қисқа муддатли облигациялар ойлик ўртача қолдиғи бўйича лимитлар 20 трлн сўмгача оширилди.
Банкларга жорий йилнинг 1 июлига қадар:
- чакана операциялар бўйича валюта курсларини белгилашда валюта биржасида Call-аукцион натижасида шаклланган валюта курсидан фойдаланиш имконияти берилди;
- тижорат банклари томонидан аукционларда харид қилинадиган Марказий банк облигациялари бўйича фоиз ставкалари даражаси асосий ставканинг юқори чегарасигача кенгайтирилди;
- икки ҳафталик депозит аукционлари бўйича лимитлар бекор қилинди.
Аввалроқ Марказий банк раиси Ўзбекистонда доллар курси кескин ошиб кетганига изоҳ берган эди.
Изоҳ (0)