Тошкент шаҳри ТҲАЙ ва Фарғона йўли кўчаларини бирлаштирувчи иккита йўл таъмирлаш ишлари сабабли 19 март кунидан бошлаб ишлар якунига қадар ёпилади. Бу ҳақда шаҳар ҳокимлиги хабар қилди.
Қайд этилишича, таъмирлаш ишлари сабаб ҳудуддаги Compass савдо-кўнгилочар мажмуаси ёнидаги йўл қисми ҳамда ҳалқа йўлининг Тантана кўчаси билан кесишмасидан Фарғона йўл кўчасига бурилиш қисмида ҳаракат тўхтатилади. Тантана кўчаси транспорт қатнови учун очиқ бўлади.
«Ноқулайликлар учун узр сўраймиз ва айланма йўллардан фойдаланишни илтимос қиламиз», — дейилади хабарда.
Аввалроқ Тошкент шаҳри Аҳмад Дониш кўчасида ерусти пиёдалар ўтиш кўприги қурилиши бошлангани сабабли 11 мартдан 15 мартгача кўчанинг бир қисмида қурилиш ва таъмирлаш ишлари олиб борилиши ҳақида хабар берилганди. Шу сабаб Аҳмад Дониш кўчасининг Гулғунча (Ашурова) кўчаси билан кесишмасидан бошлаб, қатнов қисмининг бир тарафи ҳар икки томондан транспорт учун ёпилган.
Эслатиб ўтамиз, Тошкент шаҳрининг Абдулла Қодирий кўчасида жойлашган туннелда таъмирлаш ишлари олиб борилиши сабаб ҳаракат вақтинча чекланиши хабар қилинганди. 11 февралдан бошлаб бир ой давомида кўчадан ўтган туннелда реконструкция ишлари олиб борилган.
Шунингдек, Тошкент шаҳри Яшнобод туманининг Ўш кўчаси бўйлаб Қорасув канали устидан ўтувчи автомобиль йўли кўприги реконструкция қилинади. Шу сабабли Ўш кўчаси «Дўстлик» маданият ва истироҳат боғи кўприги билан кесишмасидан Бойсун кўчаси кесишмасигача ва ундан Ўш 1-тор кўчаси кесишмасигача бўлган оралиқ 2022 йилнинг 11 февралидан март ойи охиригача автомобиллар ҳаракати учун ёпилади.
Изоҳ (0)