Тошкентдаги «Ўзбекистон» халқаро анжуманлар саройида Шавкат Мирзиёевнинг соғлиқни сақлаш соҳаси вакиллари билан «Ўзбекистон тиббиёти — инсон қадри учун» мавзусидаги очиқ мулоқоти бўлиб ўтмоқда, деб хабар бермоқда «Дарё» мухбири.
Мулоқот давомида президент болаларга бирламчи бўғинда кўрсатилаётган тиббий хизматларни юқори технологик амалиётлар билан боғлаш зарурлигини айтиб ўтган.
«Бу борада, Республика ихтисослашган педиатрия марказида генетик лаборатория ҳамда унинг 13 та ҳудудий бўлимлари ташкил этилади. Ушбу лаборатория болалар орасида ногиронликка олиб келувчи, шу жумладан, кам учрайдиган (орфан) касалликларни эрта аниқлаш бўйича генетик текширувлар ўтказадиган, замонавий асбоб-ускуналар билан таъминланади. Бунинг учун, 15 миллион доллар жалб қилинади.
Шунингдек, республикада спинал мушак атрофияси диагнози қўйилган бемор болаларга (75 нафар) зарур дори воситаларини бепул етказиб бериш тизими жорий этилади. Бунга, ҳар йили 110 миллиард сўм ажратилади. Шу билан бирга, республика бўйича 46 та туманлараро перинатал марказлари ташкил этилиб, уларда чақалоқлар реанимацияси бўлимлари фаолияти йўлга қўйилади», — дейди президент.
Давлат раҳбари «хусусий тиббиёт учун солиқ имтиёзлари ва субсидияларни қамраб олган қўшимча қўллаб-қувватлаш тизими жорий этилганини» эслаб ўтган.
«1 апрелдан бошлаб тиббиёт ташкилотлари томонидан чет элдан олиб кириладиган тиббий жиҳозлар, буюмлар, асбоб-ускуна ва материаллар 2025 йил 1 январгача қўшилган қиймат солиғи ва божхона божидан озод қилинади. Мурожаатларда, шунингдек, хусусий клиникаларга малакали мутахассисларни жалб қилишда, Ўзбекистонда ишлаш рухсатномаси учун, 700 мингдан 40 миллион сўмгача тўлов мавжудлиги кўрсатилган. Ушбу талаб, ҳатто қисқа муддатда юқори технологик операциялар ҳамда шифокорларга ‘мастер-класс’ ўтказишга таклиф этилган мутахассисларга ҳам қўлланилган», — дейди давлат раҳбари.
«Ушбу муаммоларга тўғри ечим топиш учун, 2022 йил 1 апрелдан бошлаб хорижий шифокорларга Ўзбекистонда ишлаш рухсатномасини бериш бўйича тўловлар миқдори кескин камайтирилади, хусусий клиникалардан ‘туризм йиғими’ ундириш бекор қилинади. Хусусий тиббиёт муассасалари учун, лицензия олишда санитария ва қурилиш талаблари тубдан қайта кўриб чиқилади», — дейди Шавкат Мирзиёев.
Давлат раҳбари эндиликда аҳоли имтиёзли йўлланма билан нафақат давлат шифохоналарига, балки ўзи танлаган хусусий клиникаларга ҳам бемалол бориши мумкин бўлишини айтган. Таъкидланишича, бундан буён даволаниш учун ажратилган маблағ эса беморнинг ортидан боради.
Аввалроқ Шавкат Мирзиёев 3 мингдан ортиқ маҳаллалар аҳолиси оилавий шифокорлик пунктига бориш учун 75 километргача йўл босишга мажбур бўлаётгани ҳақида гапирганди. «Мана шундай камчилик ва нуқсонлар сабабли, аҳоли тиббиёт тизимидан ҳали тўлиқ рози эмас», — деган президент.
Изоҳ (0)