Toshkentdagi “O‘zbekiston” xalqaro anjumanlar saroyida Shavkat Mirziyoyevning sog‘liqni saqlash sohasi vakillari bilan “O‘zbekiston tibbiyoti — inson qadri uchun” mavzusidagi ochiq muloqoti bo‘lib o‘tmoqda, deb xabar bermoqda “Daryo” muxbiri.
Muloqot davomida prezident bolalarga birlamchi bo‘g‘inda ko‘rsatilayotgan tibbiy xizmatlarni yuqori texnologik amaliyotlar bilan bog‘lash zarurligini aytib o‘tgan.
“Bu borada, Respublika ixtisoslashgan pediatriya markazida genetik laboratoriya hamda uning 13 ta hududiy bo‘limlari tashkil etiladi. Ushbu laboratoriya bolalar orasida nogironlikka olib keluvchi, shu jumladan, kam uchraydigan (orfan) kasalliklarni erta aniqlash bo‘yicha genetik tekshiruvlar o‘tkazadigan, zamonaviy asbob-uskunalar bilan ta’minlanadi. Buning uchun, 15 million dollar jalb qilinadi.
Shuningdek, respublikada spinal mushak atrofiyasi diagnozi qo‘yilgan bemor bolalarga (75 nafar) zarur dori vositalarini bepul yetkazib berish tizimi joriy etiladi. Bunga, har yili 110 milliard so‘m ajratiladi. Shu bilan birga, respublika bo‘yicha 46 ta tumanlararo perinatal markazlari tashkil etilib, ularda chaqaloqlar reanimatsiyasi bo‘limlari faoliyati yo‘lga qo‘yiladi”, — deydi prezident.
Davlat rahbari “xususiy tibbiyot uchun soliq imtiyozlari va subsidiyalarni qamrab olgan qo‘shimcha qo‘llab-quvvatlash tizimi joriy etilganini” eslab o‘tgan.
“1-apreldan boshlab tibbiyot tashkilotlari tomonidan chet eldan olib kiriladigan tibbiy jihozlar, buyumlar, asbob-uskuna va materiallar 2025-yil 1-yanvargacha qo‘shilgan qiymat solig‘i va bojxona bojidan ozod qilinadi. Murojaatlarda, shuningdek, xususiy klinikalarga malakali mutaxassislarni jalb qilishda, O‘zbekistonda ishlash ruxsatnomasi uchun, 700 mingdan 40 million so‘mgacha to‘lov mavjudligi ko‘rsatilgan. Ushbu talab, hatto qisqa muddatda yuqori texnologik operatsiyalar hamda shifokorlarga ‘master-klass’ o‘tkazishga taklif etilgan mutaxassislarga ham qo‘llanilgan”, — deydi davlat rahbari.
“Ushbu muammolarga to‘g‘ri yechim topish uchun, 2022-yil 1-apreldan boshlab xorijiy shifokorlarga O‘zbekistonda ishlash ruxsatnomasini berish bo‘yicha to‘lovlar miqdori keskin kamaytiriladi, xususiy klinikalardan ‘turizm yig‘imi’ undirish bekor qilinadi. Xususiy tibbiyot muassasalari uchun, litsenziya olishda sanitariya va qurilish talablari tubdan qayta ko‘rib chiqiladi”, — deydi Shavkat Mirziyoyev.
Davlat rahbari endilikda aholi imtiyozli yo‘llanma bilan nafaqat davlat shifoxonalariga, balki o‘zi tanlagan xususiy klinikalarga ham bemalol borishi mumkin bo‘lishini aytgan. Ta’kidlanishicha, bundan buyon davolanish uchun ajratilgan mablag‘ esa bemorning ortidan boradi.
Avvalroq Shavkat Mirziyoyev 3 mingdan ortiq mahallalar aholisi oilaviy shifokorlik punktiga borish uchun 75 kilometrgacha yo‘l bosishga majbur bo‘layotgani haqida gapirgandi. “Mana shunday kamchilik va nuqsonlar sababli, aholi tibbiyot tizimidan hali to‘liq rozi emas”, — degan prezident.
Izoh (0)