Олий Мажлис Сенатининг йигирма тўртинчи ялпи мажлисида сўзга чиққан ташқи ишлар вазири Абдулазиз Комилов Россияга қарши жорий этилган санкцияларнинг Ўзбекистонга таъсири ҳақида тўхталиб ўтди, деб хабар бермоқда «Дарё» мухбири.
«Россияга ғарб давлатлари томонидан жорий этилган чеклов чоралари — санкциялар Ўзбекистонга ҳам тўғридан-тўғри таъсир қиляпти. Ҳозирда мамлакатимизни бундай санкциялардан ҳимоя қилишга қаратилган ва уларнинг салбий таъсирининг олдини оладиган чора-тадбирларни амалга ошириш биз учун муҳим аҳамият касб этади», — деди вазир.
«Украинадаги ҳамюртларимизни юртимизга кўчириб олиб келиш бўйича ишлар давом эттирилмоқда. Бунда Украина ва Польша давлатидаги элчихоналаримиз, айниқса, Польша давлати президенти томонидан ёрдам берилмоқда.
Бугунги кунда Украинадаги ватандошларимизнинг 6 мингга яқини олиб келинди. Яна 300 га яқини Украинада бўлиб турибди. Улар билан мулоқотдамиз, ёрдам беряпмиз. Битта мураккаб масала — хавфсизлик масаласи. Лекин бунинг ҳам йўлини топиб, яқин орада уларни қайтаришга ҳаракат қиламиз», — дейди ташқи ишлар вазири.
Эслатиб ўтамиз, Ўзбекистон Украина ва Россия атрофидаги вазият бўйича «вазмин, нейтрал позицияда». «Мамлакатимиз азалдан ҳам Россия, ҳам Украина билан яқин, дўстона муносабатларга эга. Биз кенг минтақамизда тинчлик, барқарорлик ва изчил тараққиёт бўлишидан манфаатдормиз. Барча баҳс ва келишмовчиликлар фақатгина халқаро ҳуқуқ нормалари асосида ҳал қилиниши лозим», — деган президент матбуот котиби Шерзод Асадов Мирзиёев ва Путин ўртасидаги телефон мулоқоти юзасидан маълумот бериб.
Изоҳ (0)