Адлия вазири томонидан «Нотариуслар томонидан амалга ошириладиган ҳуқуқий ва техник тусдаги қўшимча ҳаракатлар учун ундириладиган тўловларнинг максимал миқдорларига ўзгартириш киритиш тўғрисида»ги буйруқ имзоланди, деб хабар беради Норма.
Ҳужжат президентнинг 2018 йил 13 апрелдаги «Ўзбекистон Республикаси Адлия вазирлиги фаолиятини янада такомиллаштиришга доир ташкилий чора-тадбирлар тўғрисида»ги ПҚ-3666-сон қарори ҳамда Вазирлар Маҳкамасининг 2020 йил 16 мартдаги «Нодавлат нотариал фаолиятни тартибга солувчи норматив-ҳуқуқий ҳужжатларни тасдиқлаш тўғрисида»ги 156-сон қарорига мувофиқ қабул қилинган.
Шундай қилиб, гаров (ипотека) ва лизинг шартномаларини тасдиқлаш учун ҳақ миқдори барча шахслар учун БҲМнинг 10 фоизигача (27 минг сўм) камайтирилди. Илгари жисмоний шахслар учун 20 фоиз ва агар битта томон юридик шахс бўлса — БҲМнинг 50 фоизни ташкил қилган.
Ўз навбатида, мерос иши бўйича тушунтиришлар бериш учун тўланадиган ҳақ миқдори икки баравар кўпайди ва энди БҲМнинг 20 фоизини (54 минг сўм) ташкил қилади.
Шунингдек, нотариал тасдиқланадиган ҳужжатлар лойиҳаларини тайёрлаш тартибига қуйидаги ўзгартиришлар киритилган:
- гаров (ипотека) ва лизинг шартномалари лойиҳаларини тайёрлаш учун тўланадиган ҳақ миқдори. Жисмоний шахслар учун (ҳамда битта тараф жисмоний шахс бўлса) бу миқдор БҲМнинг 15 фоизини (40,5 минг сўм) ташкил этади. Илгари бу ҳақ икки баравар кўпроқ эди ва 30 фоизни ташкил қилган. Агар шартноманинг икки тарафи юридик шахслар бўлса, ҳақ миқдори БҲМнинг 100 фоизини (270 минг сўм) ташкил қилади, олдинги таҳририда бу миқдор томонлардан бири юридик шахс бўлган тақдирда қўлланган;
- барча шахслар (юридик ва жисмоний) учун мулкни ижарага бериш шартномаларини тайёрлаш учун ҳақ миқдори БҲМнинг 20 фоизини (54 минг сўм) ташкил қилади. Илгари бу миқдор шартнома тарафлари кимлигига қараб фарқланарди. Жисмоний шахслар учун — 20 фоиз, томонлардан бири юридик шахс бўлса — 50 фоиз;
- меросга бўлган ҳуқуқ тўғрисида гувоҳнома лойиҳасини тайёрлаш учун энди БҲМнинг 100 фоизи (270 минг сўм) ундирилади. Илгари бу миқдор 20 фоизни ташкил қилган.
Ҳужжат қонун ҳужжатлари маълумотлари миллий базасида эълон қилинган ва 15 мартдан кучга кирган.
Аввалроқ Ўзбекистонда автомобилни аукцион орқали ижарага беришда шартномани нотариал тасдиқлаш бекор қилингани, Ўзбекистонда илк бор нотариал ҳаракат онлайн тарзда амалга оширилгани тўғрисида хабар берилганди.
Изоҳ (0)