Oliy Majlis Senatining yigirma to‘rtinchi yalpi majlisida so‘zga chiqqan tashqi ishlar vaziri Abdulaziz Komilov Rossiyaga qarshi joriy etilgan sanksiyalarning O‘zbekistonga ta’siri haqida to‘xtalib o‘tdi, deb xabar bermoqda “Daryo” muxbiri.
“Rossiyaga g‘arb davlatlari tomonidan joriy etilgan cheklov choralari — sanksiyalar O‘zbekistonga ham to‘g‘ridan to‘g‘ri ta’sir qilyapti. Hozirda mamlakatimizni bunday sanksiyalardan himoya qilishga qaratilgan va ularning salbiy ta’sirining oldini oladigan chora-tadbirlarni amalga oshirish biz uchun muhim ahamiyat kasb etadi”, — dedi vazir.
“Ukrainadagi hamyurtlarimizni yurtimizga ko‘chirib olib kelish bo‘yicha ishlar davom ettirilmoqda. Bunda Ukraina va Polsha davlatidagi elchixonalarimiz, ayniqsa, Polsha davlati prezidenti tomonidan yordam berilmoqda.
Bugungi kunda Ukrainadagi vatandoshlarimizning 6 mingga yaqini olib kelindi. Yana 300 ga yaqini Ukrainada bo‘lib turibdi. Ular bilan muloqotdamiz, yordam beryapmiz. Bitta murakkab masala — xavfsizlik masalasi. Lekin buning ham yo‘lini topib, yaqin orada ularni qaytarishga harakat qilamiz”, — deydi tashqi ishlar vaziri.
Eslatib o‘tamiz, O‘zbekiston Ukraina va Rossiya atrofidagi vaziyat bo‘yicha “vazmin, neytral pozitsiyada”. “Mamlakatimiz azaldan ham Rossiya, ham Ukraina bilan yaqin, do‘stona munosabatlarga ega. Biz keng mintaqamizda tinchlik, barqarorlik va izchil taraqqiyot bo‘lishidan manfaatdormiz. Barcha bahs va kelishmovchiliklar faqatgina xalqaro huquq normalari asosida hal qilinishi lozim”, — degan prezident matbuot kotibi Sherzod Asadov Mirziyoyev va Putin o‘rtasidagi telefon muloqoti yuzasidan ma’lumot berib.
Izoh (0)