Хитой кучайтирилган карантин режими натижасида мамлакатга коронавирус кириб келиши ва республикадан бошқа давлатларга тарқалишининг олдини олишга эришган. Бу ҳақда Санитария эпидемиологик осойишталик ва жамоат саломатлиги хизмати бошлиғи ўринбосари Ботир Қурбонов «Дарё» мухбири Мусулмонбек Иброҳимовга берган қисқача интервьюсида айтиб ўтди.
Йил бошида Хитойда коронавирус яна қайта кучайиб бораётгани ҳақида хабарлар тарқалган эди. Хусусан, 1,2 миллион аҳолига эга Ючжоу шаҳри, ундан аввал 13 миллион аҳолига эга Сиан шаҳри локдаунга ёпилганди. Байсе шаҳри (Гуанси-Чжуан автоном тумани) маъмурияти COVID-19 га чалиниш ҳолатларининг ортиши муносабати билан шаҳарда 7 февралдан локдаун жорий этилганини эълон қилган.
«Хитой ҳукумати 2019 йил 31 декабрь куни мамлакатда коронавирус пайдо бўлгани, касаллик кўпайиб бораётгани ва у бошқа давлатларга тарқалаётгани бўйича баёнот берган. 2020 йил 11 март куни Жаҳон соғлиқни сақлаш ташкилоти томонидан бутун дунёда пандемия эълон қилинган. Шу давргача дунёнинг бошқа давлатларига Хитойда бўлган касаллик ўз таъсирини кўрсатган. Аммо ундан кейинги ҳолатда Хитой карантин тадбирларини кучайтириб, коронавирусни мамлакатга кириб келиши ва бошқа давлатларга чиқишини тўхтатди. Яъни Хитойда бугунги кунда шундай тартиб жорий қилиндики, мамлакатга касалликнинг кириб келишини ва давлатдан бошқа жойларга чиқишининг олдини олиш тадбирлари кучайтирилган. Ҳозирда Хитойдан бошқа давлатларга касаллик тарқалишининг эҳтимоли пандемия бошидаги ҳолатга нисбатан 180 даража бошқача», — деди хизмат бошлиғи ўринбосари.
Ботиржон Қурбоновнинг айтишича, Ўзбекистонда коронавирус билан боғлиқ вазият яна жиддийлашса, карантин чекловлари кучайтирилиши мумкин.
«Ўзбекистонда коронавирус билан боғлиқ хавфли вазиятни бартараф этишга эришилди. Касаллик куни кеча бир суткада 21 кишида қайд этилгани эпидемиологик барқарорлик таъминланганидан далолат беради. Ҳозирда барча муассасаларда тиббий ниқоблардан фойдаланиш ихтиёрий. Аммо бу тиббий ниқобдан умуман фойдаланилмасин, дегани эмас. Қўлларга антисептик сепиш, масофа сақлаш ҳам барча муассасаларда ихтиёрий равишда қолдирилди. Агар коронавируснинг янги штамми пайдо бўлса ва Ўзбекистонда дунёдаги сингари мураккаб жараён бошланса, албатта, кучайтирилган режимга, тиббий ниқоблар тақиш ва бошқа тартибларга қайтиш эҳтимоли йўқ эмас. Қачонки дунёда шу касаллик тугатилса, Ўзбекистонда ҳам тугатилади, дейиш мумкин. Бугунги кундаги ҳолатга карантин чекловлари вақтинча юмшатилиши кузатилмоқда, деб қараш керак», — деди мутахассис.
Аввалроқ Ўзбекистонда 2022 йилнинг 1 мартидан бошлаб фуқароларнинг очиқ ҳавода ниқоб тақмаслигига рухсат берилгани хабар қилинганди. Эпидемик вазиятдан келиб чиққан ҳолда фуқароларнинг ижтимоий масофасини таъминлаш қийин бўлган жойларда ниқоб тақиш тавсия этилган. Соғлиқни сақлаш муассасаларида тиббиёт ходимларининг, улар коронавирус билан касалланганлар билан алоқада бўлишидан қатъи назар, ниқоб тақиши талаби сақлаб қолинган.
Изоҳ (0)