Шавкат Мирзиёев ДСҚнинг Маълумотларни қайта ишлаш марказини бориб кўрди

Шавкат Мирзиёев 16 март куни Давлат солиқ қўмитасининг Маълумотларни қайта ишлаш марказини бориб кўрди. Бу ҳақда Президент матбуот хизмати хабар қилди.

Қайд этилишича, мамлакатда аҳоли ва бизнес учун қулайликларни ошириш, инсон аралашувини камайтириш мақсадида солиқ органлари фаолияти изчил рақамлаштирилмоқда. Хусусан, ушбу марказ Ўзбекистон президентининг 2020 йил 30 октябрдаги фармонига мувофиқ, тўлиқ янгиланган. Давлат бюджетидан ажратилган 100 миллиард сўм эвазига бинолар таъмирланиб, узлуксиз электр таъминоти қурилмалари, претсизион кондиционерлар, катта ҳажмли сервер ва компьютерлар билан жиҳозланган.

«Натижада марказ қуввати 8 мартага ошган, электрон хизматлар кўлами кенгайган. Шахсий карточкаларда салдо қаторларини ҳисоблаш каби мураккаб жараёнлар 10 баробар тезлашган. Масалан, илгари республика бўйича ҳисоблашга 24 соат кетган бўлса, эндиликда бу жараён 2-3 соатда амалга оширилмоқда. Бу яширин иқтисодиётни қисқартиришда муҳим омил бўлмоқда», — дейилади хабарда.

Киберҳужумдан ҳимоя, бизнес-аналитика технологиялари жорий қилинди. «E-ijara», «Э-имтиёз», «Қўшилган қиймат солиғи тўловчилари», «Солиқ текширувлари», «Автоматлаштирилган камерал назорат тизими», «Солиқ узилиши коэффициенти» каби янги дастурий маҳсулотлар ишлаб чиқилган.

«Бу марказни мамлакатимиз солиқ тизимининг «мияси» дейиш мумкин. Бу ерга барча солиқ тўловчиларнинг маълумотлари интеграция қилинган. 50 нафарга яқин малакали мутахассис солиқ айланмасини онлайн режимда кузатиб, масофадан тезкор хизмат кўрсатади», — дейилади Президент матбуот хизмати хабарида.

Давлат раҳбари марказдаги иш жараёнини кўздан кечирган. Солиқ органлари фаолияти самарадорлигини ошириш бўйича топшириқлар берган.