Шавкат Мирзиёев 16 март куни Қозоғистон президенти Қосим-Жўмарт Тўқаев билан телефон орқали мулоқот қилди. Бу ҳақда Президент матбуот хизмати хабар қилди.
Қайд этилишича, давлат раҳбарлари икки томонлама муносабатлар кун тартиби ва Марказий Осиёда минтақавий ҳамкорликнинг долзарб масалаларини муҳокама қилган. Жаҳон иқтисодиётидаги инқирозли ҳодисаларнинг салбий оқибатларини камайтириш мақсадида яқиндан ҳамкорликни давом эттириш ва саъй-ҳаракатларни самарали мувофиқлаштиришга алоҳида эътибор қаратилган.
Икки томонлама савдо ҳажмининг ўсиш суръатини таъминлаш, саноат, энергетика, қишлоқ хўжалиги, озиқ-овқат ва тўқимачилик тармоқлари, транспорт ва логистика соҳаларида йирик кооперация лойиҳаларини амалга оширишни жадаллаштириш учун қулай шароитлар яратиш, шунингдек, маданий-гуманитар алмашинув дастури доирасидаги қўшма тадбирларни фаол ўтказиш муҳимлиги қайд этилган.
Мулоқот якунида давлат раҳбарлари яқинлашиб келаётган Наврўз байрами муносабати билан бир-бирини қутлаб, қўшни халқларга тинчлик-осойишталик, фаровонлик ва равнақ тилаган. Суҳбат очиқ ва дўстона руҳда ўтган.
Эслатиб ўтамиз, кеча, 15 март куни Шавкат Мирзиёев телефон мулоқотида Туркманистон президенти Гурбангули Бердимуҳамедовни муҳим сиёсий тадбир — президент сайлови муваффақиятли ўтказилгани, Туркманистоннинг сайланган президенти Сердар Бердимуҳамедовни эса сайловда қозонган ишончли ғалабаси билан табриклаганди.
Изоҳ (0)