Қашқадарё вилояти ИИБ ЖЦБ Карантин тадбирларни таъминлаш бўлинмаси ҳамда Ветеринария ва чорвачиликни ривожлантириш бўлими ходимлари «Умакай» ЙПХ масканида Тошкентга олиб кетилаётган номаълум ҳайвон гўштини тўхтатиб қолди. Бу ҳақда вилоят ИИБ матбуот хизмати хабар берди.
Маълум қилинишича, Чироқчи туман ҳудудида жойлашган «Умакай» ЙПХ масканида Қашқадарё—Тошкент йўналишида ҳаракатланиб кетаётган Nexia русумли автотранспорт воситаси тўхтатилган. Текширув давомида автомобиль ветеринария-санитария талабларига зид равишда ҳеч қандай ҳужжатларсиз, келиб чиқиши номаълум бўлган тахминан 900 килограмм оғирликдаги гўшт маҳсулотлари олиб кетилаётгани маълум бўлган.
Аввалроқ Жиззахда санитария қоидаларига зид равишда олиб кетилаётган 184 кг гўшт аниқлангани, Қашқадарёда Cobalt юкхонасидан ҳужжатсиз 230 кг гўшт топилгани, Фарғонада 14,5 тонна гўштни кўмир остига яшириб, Тожикистонга олиб ўтишга уринган шахслар аниқлангани тўғрисида хабар берилганди.
Изоҳ (0)