«ПСЖ» «Барселона»га Неймарни сотиб олишни таклиф қилди

«ПСЖ» Неймардан тезроқ қутулиш истагида. Раҳбарият «Барселона»га футболчини таклиф қилган.

Foot Mercato’нинг хабарига кўра, ҳужумчи энди Париж клубида дахлсиз ҳисобланмаяпти ва раҳбарият бразилиялик футболчига бир неча ойдан буён янги жамоа изламоқда. Охирги ҳафталарда парижликлар Европанинг бир нечта жамоаларига, жумладан, «Барселона»га ҳам Неймарни сотиб олишни таклиф қилган.

30 ёшли футболчи ва «Барселона» ушбу трансферга қандай муносабат билдириши ҳозирча номаълум.

Аввалроқ Неймар «Реал»га қарши ўйиндан сўнг Доннарумма билан жанжаллашиб кетгани, аммо бразилияликнинг ўзи бу хабарларни рад этгани хабар қилинганди. «Бордо»га қарши ўйинда унга нисбатан мухлислар ҳуштакбозлик уюштиргани учун Неймар жамоани тарк этиши ҳақида жиддий ўйлаётгани айтилганди. 

Футболчи жорий мавсум «ПСЖ» сафида барча мусобақаларда 20 та ўйинда майдонга тушиб, 5 та голга муаллифлик қилган. Бразилиялик ноябрь ойида олган жароҳати туфайли мавсумнинг катта қисмини ўтказиб юборди.