«Ливерпуль»нинг Муҳаммад Салоҳ билан музокаралари боши берк кўчага кириб қолган. Футболчи Ла Лигага кетмоқчи эмас

«Ливерпуль» Муҳаммад Салоҳ билан янги шартнома борасида келиша олмаяпти.

Журналист Фабрисио Романонинг ёзишича, ҳозирда футболчи бутун диққат-эътиборини «Ливерпуль»даги ўйинига қаратган. Янги шартнома борасидаги музокаралар бузилган, энди барчаси инглиз клубининг ҳаракатларига боғлиқ.

Салоҳ келаётган ёзда жамоани тарк этиш истагида ёнаётгани йўқ. Мисрлик футболчининг шартномаси 2023 йилнинг ёзида якунига етади ва ундан сўнг эркин агент сифатида клубни тарк этиши мумкин бўлади.

Аввалроқ Муҳаммад Салоҳга «Барселона» қизиқиш билдираётгани ҳақида хабар қилинганди. Аммо Ла Лига жамоаларига ўтиш футболчининг режаларида йўқ.

Салоҳ 2017 йилдан бери «қизиллар» сафида тўп суриб келмоқда. 29 ёшли футболчи 2021/22 йилги мавсум «Ливерпуль» иштирок этган барча мусобақаларда 35 та ўйинда майдонга тушиб, 28 та гол ва 10 та голли узатмага муаллифлик қилган.