“PSJ” Neymardan tezroq qutulish istagida. Rahbariyat “Barselona”ga futbolchini taklif qilgan.
Foot Mercato’ning xabariga ko‘ra, hujumchi endi Parij klubida daxlsiz hisoblanmayapti va rahbariyat braziliyalik futbolchiga bir necha oydan buyon yangi jamoa izlamoqda. Oxirgi haftalarda parijliklar Yevropaning bir nechta jamoalariga, jumladan, “Barselona”ga ham Neymarni sotib olishni taklif qilgan.
30 yoshli futbolchi va “Barselona” ushbu transferga qanday munosabat bildirishi hozircha noma’lum.
Avvalroq Neymar “Real”ga qarshi o‘yindan so‘ng Donnarumma bilan janjallashib ketgani, ammo braziliyalikning o‘zi bu xabarlarni rad etgani xabar qilingandi. “Bordo”ga qarshi o‘yinda unga nisbatan muxlislar hushtakbozlik uyushtirgani uchun Neymar jamoani tark etishi haqida jiddiy o‘ylayotgani aytilgandi.
Futbolchi joriy mavsum “PSJ” safida barcha musobaqalarda 20 ta o‘yinda maydonga tushib, 5 ta golga mualliflik qilgan. Braziliyalik noyabr oyida olgan jarohati tufayli mavsumning katta qismini o‘tkazib yubordi.
Izoh (0)