«Насаф» Осиё Чемпионлар Лигаси плей-офф босқичида «Банияс»ни мағлуб этиб (2:0), мусобақанинг гуруҳ босқичига йўлланма олди.
«Насаф» ОЧЛ E гуруҳидан жой олди. Ўзбекистон Кубоги соҳиби гуруҳда Қатарнинг «Ас-Садд», Саудия Арабистонининг «Ал-Файсали» ва Иорданиянинг «Ал-Виҳдат» жамоаларига қарши баҳс олиб боради.
Шунингдек, D гуруҳидан жой олган «Пахтакор»нинг учинчи рақиби ҳам маълум бўлди. Саудиянинг «Ат-Тавун» клуби Суриянинг «Ал-Жайиш»ини енгиб, гуруҳ босқичига йўл олди. «Пахтакор»нинг гуруҳидан яна «Ад-Дуҳайл» (Қатар) ва «Сепаҳон» (Эрон) каби жамоалар жой олган.
Чемпионлар Лигасининг ғарбий минтақасидаги гуруҳ босқичи ўйинлари Саудия Арабистонида марказлашган тизимда ўтказилади. «Пахтакор» ўз учрашувларини Бурайда шаҳрида ўтказса, «Насаф»нинг гуруҳидаги ўйинлар Даммам шаҳрида бўлиб ўтади.
Қаршиликларнинг ғалабаси «Сўғдиёна»га ОФК Кубоги йўлланмасини тақдим этди. Жиззахликлар дебют мавсумда E гуруҳида «Олтин Аср» (Туркманистон), «ЦСКА» (Тожикистон) ва «Нефтчи»га (Қирғизистон) қарши ўйнайди.
ОФК Кубоги E гуруҳидаги ўйинлар Тожикистоннинг Душанбе шаҳрида 24—30 июнь кунлари ўтказилади.
Изоҳ (0)