Андижонда хотинини доимий равишда уриб, унга жиддий тан жароҳати етказган ва унинг ўлимига сабаб бўлган эрга суд ҳукми ўқилди. Бу ҳақда «Дарё»га вилоят суди ахборот хизмати хабар берди.
Жиноят ишлари бўйича Жалақудуқ туман судида бўлиб ўтган суд жараёнида аниқланишича, фуқаро Х.А. 2020 йилнинг июнь ойида Булоқбоши туманида яшовчи Ю.К. билан иккинчи марта оила қурган. Тўйдан кўп ўтмай хотин Ю.А. рухсатсиз ота уйига кетиб қоладиган одат чиқарган. Шу сабаб эр-хотин ўртасида келишмовчилик келиб чиққан.2021 йилнинг 19 март куни соат 12:30 да Х.А. турмуш ўртоғи Ю.К.га тушлик тайёрлашни буюриб, кўчага чиқиб кетган. Бироздан сўнг уйига қайтгач, хотини яна уйда йўқлигини кўрган. Сўроқсиз кетиб қолган хотинини қайнопасининг уйидан топиб, яшаш уйига олиб қайтган.
Оилавий келишмовчилик 20 март куни ҳам давом этган. Шу куни оқшомда Х.А. аёлининг уйдан чиқиб кетаётганини кўриб, кўчадан қайтариб, уйга олиб кирган ва жаҳл устида уни силтаб, бошига бир неча марта қўли билан урган. Зарбалардан ўзини йўқотган аёлнинг боши кетма-кет уйнинг ёғоч ва темирдан ясалган қисмига тегиб, ўнг кўзи кўкариб қолган.
«Бу ҳолатни кўриб, ўзимни қўлга олиб уни уйга киритиб юбордим. Аммо кечаси соат бирларда у ўрнидан туриб, яширинча ташқарига чиқиб кетмоқчи бўлди. Шунда ундан қаерга кетаётганини сўраб, яна қочиб кетмаслигининг олдини олиш мақсадида дўқ-пўписа қилиб, оёқларига бир неча марта тепиб, жойига ётқизиб қўйдим. Эртасига бирга нонушта қилдик. Дастурхонни йиғиб бўлгач, у ётоқхонадаги шкафларни чангини артиш учун кириб кетаётганини кўриб, ортидан кирдим. Шу пайт кутилмаганда аёлим баланд овозда бақириб юборди. Дарҳол ёнига борганимда кўз қорачиқларини тепага қаратиб, деворга суянган ҳолда қотиб ўтирганини кўриб, тез ёрдамга қўнғироқ қилдим. Ўша куни шифохонага ётқизилди. Тўққиз кундан кейин шифохонада вафот этди. Хотинимнинг ўлимига унинг ётоқхонада йиқилиб тушган сабаб бўлди, деб ўйлайман. Сабаби у бир кун аввал урган тарсакимдан ўлиб қолиши мумкин эмас. Агарда ўлимига сабабчи бўлган бўлсам, қилган ишимдан чин кўнгилдан пушаймонман», — дейди судланувчи Х.А.
Ушбу ишни кўриб чиққан судья Умаржон Мирзаабдуллаев А.Х.ни Жиноят кодексининг 104-моддаси 3-қисмининг «д» банди (қасддан баданга оғир шикаст етказиш жабрланувчининг ўлишига сабаб бўлса) билан айбли деб топиб, унга нисбатан 10 йил муддатга озодликдан маҳрум қилиш жазоси тайинлаган.
Изоҳ (0)