Сўнгги кунларда содир бўлган йўл-транспорт ҳодисалари тафсилотларини тақдим этамиз.
Тошкентда Gentra ўғирлаган шахс ЙТҲга учради
2022 йил 8 март куни соат 20:30 ларда номаълум шахс Тошкент шаҳар Мирзо Улуғбек тумани Ўзбекистон овози кўчасида жойлашган автомашиналар ювиш шохобчасига келиб, шохобча кассасида ҳеч ким йўқлигидан фойдаланиб, 29 ёшли Н.Ш.га тегишли бўлган Gentra русумли автомашинани пульт ёрдамида эшикларини очиб, машинани номаълум томонга олиб қочгани аниқланган.
Мазкур ҳолат юзасидан Мирзо Улуғбек туман бўйича ИИО ФМБ ҳузуридаги Тергов бўлими томонидан номаълум шахсга нисбатан Жиноят кодекснинг 267-моддаси 1-қисми (транспорт воситасини олиб қочиш) билан жиноят иши қўзғатилган.
Олиб борилган тезкор қидирув тадбирлари давомида номаълум шахс олиб қочилган транспорт воситасини Яккасарой тумани Шота Руставели ва Гавҳар кўчалари кесишган чорраҳада бошқариб кетаётиб, Cobalt русумли автомашина билан тўқнашув содир этгани аниқланиб, воқеа жойидан яширинмоқчи бўлганида қоидабузар ушланган.
Тергов жараёнида ушбу номаълум шахснинг шахсига аниқлик киритилганда, у муқаддам судланган Тошкент вилоятида яшовчи 24 ёшли П.Ш. экани маълум бўлган. Ҳозирда П.Ш.га нисбатан қамоққа олиш тарзидаги эҳтиёт чораси қўлланилган. Тергов давом этмоқда.
Самарқандда юк автомобили ағдарилиб кетди
Қайд этилишича, 2022 йил 13 март куни соат 06:30 ларда Самарқанд вилояти Оқдарё тумани ҳудудидан ўтувчи М-37 автомобиль йўлининг 11-километрида ҳайдовчи — 1989 йилда туғилган Э.Қ. DAF русумли юк автомобилида ҳаракатланиб бораётган вақтида бошқарувни йўқотиши оқибатида йўлнинг ўнг томонига ағдарилган.
ЙТҲ натижасида тан жароҳати олганлар йўқ. Транспорт воситасига зарар етган.
Ҳолат юзасидан Оқдарё тумани ИИБ ЙҲХБ масъул ходимлари томонидан суриштирув ишлари олиб борилмоқда.
Изоҳ (0)