Россияликларнинг Ўзбекистонга кўчиб ўтишга бўлган қизиқиши кескин ошди

Аввалроқ европаликлар ва америкаликлар Ўзбекистон орқали Россияни тарк этаётгани ҳақида хабар берилган эди.

Бироқ россияликлар ҳам бошқа давлатларга, шу жумладан, Ўзбекистонга кетишга қизиқиш билдирмоқда.

Интернетдаги қизиқишлар

Google Trends’нинг маълумотларига кўра, Россияда февраль ойининг охири ва март ойининг бошларида «Ўзбекистонга виза» ва «Ўзбекистон учун виза керакми?» қабилидаги сўровлар сони бир неча бараварга ошган:

Худди шундай ҳолат Yandex’да ҳам кузатилмоқда – россияликлар Ўзбекистонга кўчиб ўтиш учун виза керак ёки керак эмаслигига, бу ерга келиш ва яшашга қизиқиш билдиришмоқда:

Кўчиб ўтишга бўлган қизиқиш

Ушбу қизиқишлар туризм билан эмас, балки кўчиб ўтиш билан боғлиқ эканлигини бошқа фактлар ҳам тасдиқлайди. 

Масалан, Telegram’да «Ўзбекистонга кўчиш» номли каналлар пайдо бўлиб, у ерда Ўзбекистонга қандай қилиб кўчиб ўтиш мумкинлиги, айнан нималарга эътибор қаратиш, турар жой топиш, мамлакатдаги нархлар ва яна кўплаб бошқа мавзулар ҳақида гапирилади.

Россиянинг «vc.ru» сайтида ўзбекистонликлар россияликларга Ўзбекистонга оилавий ёки бизнес бўйича кўчиб ўтиш ҳақида тавсиялар беради. Бундай мақолалар кўплаб ўқишлар сони ва изоҳларни йиғмоқда. 

Бундан ташқари, нафақат Россия, балки маҳаллий оммавий ахборот воситалари ҳам Ўзбекистонга кўчиб ўтишга қарор қилган россияликлар ҳақида гапиришган.

Аввалроқ санкциялар остида қолган россияликлар Ўзбекистондан кўчмас мулк сотиб олишни бошлаётгани ҳақида хабар берилган эди.