«Дарё» нашри уч йил аввал Profelite IMP хусусий бандлик агентлиги томонидан 300 нафар фуқароларни чет элга ишлаш учун юбориши айтиб, амалда ҳеч қаерга юбормагани ва жуда кўп миқдордаги пулларни ўзлаштириб юборгани ҳақида материал тайёрлаган эди. Шундан сўнг агентлик директори Иброҳим Жонузоқов ва шерикларига нисбатан жиноят иши қўзғатилган. Иброҳим Жонузоқов тергов жараёнида ҳуқуқни муҳофаза қилувчи органларга фириб бериб, иссиз йўқолган ва қидирувга берилган. Орадан икки йилдан ортиқ вақт ўтган бўлса-да, у ҳалигача топилгани йўқ.
Ички ишлар вазирлиги ҳузуридаги Тергов департаментининг «Дарё» маълум қилишича, агентликнинг яна бир мансабдори Н.Ж. 2021 йилнинг октябрь ойида Ўзбекистонга экстрадиция қилинган ва тергов ҳаракатлари олиб борилган. Таҳририятга келиб тушган маълумотга кўра, Н.Ж. агентлик директори Иброҳим Жонузоқовнинг отаси. У аввал судья сифатида, кейинроқ бир муддат адвокат сифатида фаолият юритган.
Департамент томонидан тақдим этилган маълумотга кўра, Profelite IMP хусусий бандлик агентлиги мансабдор шахсларига нисбатан Жиноят кодексининг 168-моддаси 4-қисми «а» (жуда кўп миқдорда фирибгарлик) банди ва бошқа моддалар билан юритилган жиноят иши юзасидан дастлабки тергов ҳаракатлари олиб борилган.
Жиноят иши ҳужжатларига кўра, 2016—2019 йиллар давомида Иброҳим Жонузоқов, Н.Ж. ва М.Очилов Profelite IMP хусусий бандлик агентлигини ташкил этиб, фуқароларни Польша, Германия ва Корея давлатларига ишга жўнатишлигини ваъда қилган. Жами 300 нафар фуқарони алдаб, жуда кўп миқдордаги пулларни фирибгарлик йўли билан эгаллаган. Пулларни нақд пул кўринишида жамият балансига кирим қилмасдан қабул қилиб, шахсий манфаатларига ишлатган.
Мазкур жиноят иш 2019 йилнинг сентябрь ойида Мирзо Улуғбек тумани ИИБ ҳузуридаги Тергов бўлими томонидан Иброҳим Жонузоқовга нисбатан Жиноят кодексининг 168-моддаси 2-қисми «а» (анча миқдорда фирибгарлик) банди билан жиноят иши қўзғатилган. Тергов даврида Иброҳим Жонузоқов ва Н.Ж.га нисбатан сиртдан айб эълон қилиниб, қамоққа олиш эҳтиёт чораси қўлланилган ҳолда қидирувга берилган.
Агентлик мансабдорларидан бир М.Очилов 2020 йилнинг сентябрь ойида Жиноят кодексининг 168-моддаси 4-қисми «а» банди (жуда кўп миқдорда фирибгарлик) ва 228-моддаси «а,б» (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш – такроран ёки хавфли рецидивист томонидан, бир гуруҳ шахслар томонидан олдиндан тил бириктириб) бандлари билан айбдор деб топилиб, 8 йил 1 ой озодликдан маҳрум қилиш жазоси қўлланилган. Суд ҳукмига асосан 300 нафар жабрланувчига нисбатан етказилган моддий зарар АҚШ долларининг ҳукм чиқарилган вақт бўйича сўмга нисбатан қиймати 10 миллиард 5 миллион сўм сифатида қайта ҳисобланиб, ушбу моддий зарар айбдор шахсдан ундириш белгиланган.
Айбланувчи Н.Ж. Кореядан келтирилиб, 2021 йилнинг октябрь ойида дастлабки тергов қайта тикланиб, у билан боғлиқ тергов ҳаракатлари олиб борилган. Н.Ж. Жиноят кодексининг 168-моддаси 4-қисми «а, в» (жуда кўп миқдорда, хизмат мавқейидан фойдаланиб фирибгарлик) бандлари ва 228-моддаси 2-қисми «а,б» (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш – такроран ёки хавфли рецидивист томонидан, бир гуруҳ шахслар томонидан олдиндан тил бириктириб) бандларида кўрсатилган жиноятни содир қилганликда айбланувчи тариқасида жалб қилиниб, қамоққа олиш эҳтиёт чораси қўлланилган. Н.Ж.га оид жиноят иши жиноят ишлари бўйича Мирзо Улуғбек туман суди томонидан мазмунан кўриб чиқилмоқда.
Ушбу иш бўйича Тошкент шаҳар суди матбуот хизматининг «Дарё» сўровига берган жавобига кўра, судланувчи Н.Ж. ўзининг ҳаракатларини ижтимоий хавфлилик хусусиятини англаб етиб, хизмат мавқейидан фойдаланиб, уюшган гуруҳ томонидан ва унинг манфаатларини кўзлаб, алдаш ва ишончни суиистеъмол қилиш йўли билан ўзганинг жуда кўп миқдордаги мулкини такроран қўлга киритишда ифодаланган фирибгарлик, шунингдек, бир гуруҳ шахслар томонидан олдиндан тил бириктириб, такроран ҳужжатларни қалбакилаштириш, ҳужжатнинг қалбаки эканлигини била туриб, ундан фойдаланиш жиноятларини қуйидаги ҳолатларда содир этиш йўлига кирган.
«Судланувчи Profelite IMP xусусий бандлик агентлиги масъулияти чекланган жамиятларни ташкил қилган. Ишга жойлашиш бўйича мурожаат қилиб келган фуқароларга Корея, Польша ва бошқа давлатларга ишга юбориш ҳақидаги ваъдалар бериб, хорижий давлат корхоналари билан тузилган Ўзбекистон фуқароларини ишга жойлаштириш ва хизмат кўрсатиш ҳақидаги сохта шартномаларни кўрсатиш орқали фуқароларнинг ишончига кирган. Аммо амалда бирор-бир фуқарони ишга жўнатишни мақсад қилмасдан, ҳар бир фуқародан таклиф этилган давлатдаги ишдан келиб чиққан ҳолда 32 миллион сўмдан 50 миллион сўмгача бўлган миқдорда пул маблағларини агентликнинг банк ҳисоб рақамига кирим қилиш ва кирим қилмаслик йўли билан қўлга киритган.
Ушбу фуқароларни ҳеч қаерга ишга юбормасдан, уларни ҳуқуқни муҳофаза қилувчи органларга мурожаат қилишининг олдини олиш ва вақтни чўзиш учун фуқаролардан ўзлаштирилган пуллар эвазига вужудга келган мажбуриятларни кейинги ташкил этилган хусусий бандлик агентлиги орқали ҳал қилишга ишонтириб келган.
Жиноят натижасида жами 300 нафар жабрланувчига 974 миллион сўм миқдорида зарар етказилган», — дейилади суд ахборотида.
Тергов департаментининг қўшимча қилишича, айбланувчи Иброҳим Жонузоқовга нисбатан халқаро қидирув эълон қилинган бўлиб, кенг қамровли суриштирув ишлари олиб борилмоқда.
Изоҳ (0)