Ўзбекистон прокуратураси тарихи музейи Ўзбекистон Республикаси прокуратурасининг 30 йиллиги олдидан ташкил этилган. Ушбу давлат органининг тарихи ва ўтмишига оид музей дастлаб 2009 йилда ташкил этилиб, 2015 йилда ундаги экспонатлар бирмунча бойитилган. Бироқ кейинроқ мазкур музей тугатилиб, ундаги экспонатлар ертўлаларда қолдирилган. Бош прокурор Ниғматилла Йўлдошевнинг 2020 йил 27 январдаги фармойиши билан прокуратура органларининг кўп йиллик тарихини аҳоли, ёш ҳуқуқшунослар ва хорижий меҳмонларга ҳаққоний, тўлақонли етказиш, фуқароларда прокуратура органларининг меҳнати тасаввурларини янада бойитиш белгиланди. Фармойиш ижросини таъминлаш юзасидан тузилган ишчи гуруҳи томонидан музейлар фаолиятига доир 30 дан зиёд норматив-ҳуқуқий ҳужжатлар, республикадаги қатор музейлар фаолияти ўрганилди, улардаги экспозициялар фотосуратга олинди. «Дарё» фотомухбири ушбу янгидан ташкил этилган музейда бўлиб, у ердан фотолавҳалар тайёрлади.
Ташкилотчилар музейни яратишда узоқ йиллар хизмат бурчларини ҳалол ва виждонан бажарган, адолат ва қонунийлик йўлида шарафли йўлни босиб ўтган прокуратура ходимлари фаолиятини ёш мутахассисларга намуна қилиб кўрсатиш, тизимда фидокорона фаолият олиб борган ва хизмат бурчини бажариш вақтида вафот этган ҳамкасбларимизнинг хотирасини абадийлаштириш асосий мақсад қилиб олинганини қайд этишди.Музейни яратиш, унинг концепциясини ишлаб чиқиш ҳамда экспозициясини яратишда ҳудудий прокуратураларнинг масъул ходимлари, тарихчилар, музейшунослар, дизайнерлардан иборат гуруҳ жалб қилинган. Хусусан, Ўзбекистон Бадиий академияси ва унинг таркибидаги илмий ва ўқув муассасаларининг тажрибали музейшунос олимларининг тавсиялари ва маслаҳатлари олинган.
Қорақалпоғистон Республикаси, вилоятлар, Тошкент шаҳри ва уларга тенглаштирилган прокурорларга топшириқ юборилиб, унда прокуратура органлари тарихига оид тегишли ашё ва экспонатлар, прокуратураларда мавжуд музейлардаги ашёларнинг рўйхати, фотосурат ва видеолавҳалар жамланган ва электрон базаси шакллантирилган. «Ўзархив» агентлигидаги прокуратура органлари фаолияти тарихига оид бир неча жилддан иборат ҳужжатлар ўрганилиб, тегишли ҳужжатлар, фотосуратлар ҳамда тарихий кинотасвир нусхалари олинган. Шу билан бирга, Қатағон қурбонлари хотираси, Ўзбекистон тарихи музейи, Давлат божхона қўмитаси музейи ва бошқа бир қатор музейларнинг концепциялари таҳлил этилган.
Музей экспонатларини жамлашда 10 мингдан зиёд архив материаллари, фотосуратлар, шу соҳада фаолият олиб борган шахсларнинг шахсий буюмлари, турли даврларга оид ашёлар сараланиб олинган.Музейда 36 та асосий экспозиция стендлари жойлашган бўлиб, уларда прокуратура тарихининг энг қадимдан то бугунги кунгача бўлган даври, тизимнинг барча йўналишлари фаолиятини намойиш этишга эришилган.Музей жами 7 та бўлимдан иборат:
- Ўзбекистон давлатчилиги ва ҳуқуқи тарихи.
- Ўзбекистон прокуратура органлари тарихи (Туркистон АССР, Ўзбекистоннинг мустақилликкача бўлган даври ССР прокуратуралари тарихи).
- Ўзбекистонинг ҳар бир вилоят прокуратураси тарихи.
- «Хотира — муқаддас» (юксак матонат ва жасорат намунаси).
- Ўзбекистондаги суд-ҳуқуқ ислоҳотлари.
- Прокуратура органларининг халқаро ҳамкорлиги.
- Янги Ўзбекистон прокуратураси фаолияти
Шунингдек, музейда «Шараф девори» ҳам ташкил этилган бўлиб, унда иккинчи жаҳон урушида иштирок этган ходимлар, байналмилалчи жангчилар ҳамда хизмат вазифаларини бажариш давомида вафот этганлар ҳақида маълумотлар берилган.
Олий даражали унвонга эга бўлганлар, давлат ва идоравий мукофот олган юксак эътироф соҳиблари, қолаверса, илм-фан соҳасида ютуққа эришганлар ҳамда спорт мусобақалари ғолиблари бўлган истеъдод ва илм намоёндалари тўғрисида ҳам батафсил маълумотлар келтирилган. Музей фондида 5 мингга яқин ҳужжатлар 7 мингдан ортиқ фото ва видеоматериаллар, 2 мингга яқин экспонатлар жамланган.700 квадрат метр майдонда бунёд этилган мазкур музей келгусида янада кенгайиши, экспонатлари сони ошиб, бойиб бориши режалаштирилмоқда.
Фото
Вилоят прокуратуралари тарихидан
Маълумот учун, Ўзбекистонда музейларнинг ташкил этилиши ва фаолияти соҳасидаги муносабатларни тартибга солиш мақсадида 2008 йил 12 сентябрда «Музейлар тўғрисида»ги Қонун қабул қилинган. Шунингдек, музейларни ривожлантиришнинг инновацион ва амалий механизмини ишлаб чиқиш, кўрсатилаётган хизматлар сифатини ошириш, инфратузилмани яхшилаш, санъат ва бадиий ижодни ривожлантириш учун зарур шарт-шароитлар яратиш, жаҳон маданияти майдонида мамлакатнинг нуфузини мустаҳкамлаш мақсадида Вазирлар Маҳкамасининг 2019 йил 19 декабрда «2020–2021 йилларда Ўзбекистон Республикасида музейлар фаолиятини такомиллаштириш дастурини тасдиқлаш тўғрисида»ги қарори қабул қилинган.
Изоҳ (0)