Самарқанд шаҳри ва Паст Дарғом туманида ўртадаги келишмовчиликни муштлашув орқали ҳал қилишга уринган гуруҳлар қўлга олинди. Бу ҳақда «Дарё»га вилоят ИИБ ахборот хизмати маълум қилди.
Маълум қилинишича, ҳолат вилоят ИИБ Жиноят қидирув бошқармаси уюшган жиноятчиликка қарши кураш бўлими ҳамда ДХХ ходимлари ҳамкорлигида ўтказилган тадбирда ошкор қилинган.«Тезкор ходимлар томонидан 2022 йил 4 март соат, тахминан, 20:30 да Самарқанд шаҳар Огаҳий кўчасида бир гуруҳ шахслар ўртасида ўзаро келишмовчилик жанжал орқали ҳал қилинаётгани тўғрисида тезкор маълумот олинган ва ушбу гуруҳлар ўртасидаги оммавий жанжалнинг олди олинган», — дейилади вилоят ИИБ ахборот хизмати маълумотида.
Ҳолат ўрганилгач, 9 нафар шахсга нисбатан 15 сутка маъмурий қамоқ жазоси тайинланган.
Шунингдек, Паст Дарғом туманидаги Жума шаҳри ҳамда «Арабхона» маҳаллаларида яшовчи 15 нафар спортчи Самарқанд—Жума йўналишдаги автошоҳбекатни зўравонлик ва ўзбошимчалик билан ноқонуний равишда эгаллаб олиш мақсадида жанжал уюштирилганда ҳолат бартараф этилган.
Мазкур гуруҳларга етакчилик қилган тўрт нафар шахсга ҳам 15 сутка маъмурий қамоқ жазоси тайинланган.
Ҳолат бўйича қўшимча суриштирув ишлари олиб борилмоқда.
Изоҳ (0)