“Daryo” nashri uch yil avval Profelite IMP xususiy bandlik agentligi tomonidan 300 nafar fuqarolarni chet elga ishlash uchun yuborishi aytib, amalda hech qayerga yubormagani va juda ko‘p miqdordagi pullarni o‘zlashtirib yuborgani haqida material tayyorlagan edi. Shundan so‘ng agentlik direktori Ibrohim Jonuzoqov va sheriklariga nisbatan jinoyat ishi qo‘zg‘atilgan. Ibrohim Jonuzoqov tergov jarayonida huquqni muhofaza qiluvchi organlarga firib berib, issiz yo‘qolgan va qidiruvga berilgan. Oradan ikki yildan ortiq vaqt o‘tgan bo‘lsa-da, u haligacha topilgani yo‘q.
Ichki ishlar vazirligi huzuridagi Tergov departamentining “Daryo” ma’lum qilishicha, agentlikning yana bir mansabdori N.J. 2021-yilning oktabr oyida O‘zbekistonga ekstraditsiya qilingan va tergov harakatlari olib borilgan. Tahririyatga kelib tushgan ma’lumotga ko‘ra, N.J. agentlik direktori Ibrohim Jonuzoqovning otasi. U avval sudya sifatida, keyinroq bir muddat advokat sifatida faoliyat yuritgan.
Departament tomonidan taqdim etilgan ma’lumotga ko‘ra, Profelite IMP xususiy bandlik agentligi mansabdor shaxslariga nisbatan Jinoyat kodeksining 168-moddasi 4-qismi “a” (juda ko‘p miqdorda firibgarlik) bandi va boshqa moddalar bilan yuritilgan jinoyat ishi yuzasidan dastlabki tergov harakatlari olib borilgan.
Jinoyat ishi hujjatlariga ko‘ra, 2016—2019-yillar davomida Ibrohim Jonuzoqov, N.J. va M.Ochilov Profelite IMP xususiy bandlik agentligini tashkil etib, fuqarolarni Polsha, Germaniya va Koreya davlatlariga ishga jo‘natishligini va’da qilgan. Jami 300 nafar fuqaroni aldab, juda ko‘p miqdordagi pullarni firibgarlik yo‘li bilan egallagan. Pullarni naqd pul ko‘rinishida jamiyat balansiga kirim qilmasdan qabul qilib, shaxsiy manfaatlariga ishlatgan.
Mazkur jinoyat ish 2019-yilning sentabr oyida Mirzo Ulug‘bek tumani IIB huzuridagi Tergov bo‘limi tomonidan Ibrohim Jonuzoqovga nisbatan Jinoyat kodeksining 168-moddasi 2-qismi “a” (ancha miqdorda firibgarlik) bandi bilan jinoyat ishi qo‘zg‘atilgan. Tergov davrida Ibrohim Jonuzoqov va N.J.ga nisbatan sirtdan ayb e’lon qilinib, qamoqqa olish ehtiyot chorasi qo‘llanilgan holda qidiruvga berilgan.
Agentlik mansabdorlaridan bir M.Ochilov 2020-yilning sentabr oyida Jinoyat kodeksining 168-moddasi 4-qismi “a” bandi (juda ko‘p miqdorda firibgarlik) va 228-moddasi “a,b” (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish – takroran yoki xavfli retsidivist tomonidan, bir guruh shaxslar tomonidan oldindan til biriktirib) bandlari bilan aybdor deb topilib, 8 yil 1 oy ozodlikdan mahrum qilish jazosi qo‘llanilgan. Sud hukmiga asosan 300 nafar jabrlanuvchiga nisbatan yetkazilgan moddiy zarar AQSh dollarining hukm chiqarilgan vaqt bo‘yicha so‘mga nisbatan qiymati 10 milliard 5 million so‘m sifatida qayta hisoblanib, ushbu moddiy zarar aybdor shaxsdan undirish belgilangan.
Ayblanuvchi N.J. Koreyadan keltirilib, 2021-yilning oktabr oyida dastlabki tergov qayta tiklanib, u bilan bog‘liq tergov harakatlari olib borilgan. N.J. Jinoyat kodeksining 168-moddasi 4-qismi “a, v” (juda ko‘p miqdorda, xizmat mavqeyidan foydalanib firibgarlik) bandlari va 228-moddasi 2-qismi “a,b” (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish – takroran yoki xavfli retsidivist tomonidan, bir guruh shaxslar tomonidan oldindan til biriktirib) bandlarida ko‘rsatilgan jinoyatni sodir qilganlikda ayblanuvchi tariqasida jalb qilinib, qamoqqa olish ehtiyot chorasi qo‘llanilgan. N.J.ga oid jinoyat ishi jinoyat ishlari bo‘yicha Mirzo Ulug‘bek tuman sudi tomonidan mazmunan ko‘rib chiqilmoqda.
Ushbu ish bo‘yicha Toshkent shahar sudi matbuot xizmatining “Daryo” so‘roviga bergan javobiga ko‘ra, sudlanuvchi N.J. o‘zining harakatlarini ijtimoiy xavflilik xususiyatini anglab yetib, xizmat mavqeyidan foydalanib, uyushgan guruh tomonidan va uning manfaatlarini ko‘zlab, aldash va ishonchni suiiste’mol qilish yo‘li bilan o‘zganing juda ko‘p miqdordagi mulkini takroran qo‘lga kiritishda ifodalangan firibgarlik, shuningdek, bir guruh shaxslar tomonidan oldindan til biriktirib, takroran hujjatlarni qalbakilashtirish, hujjatning qalbaki ekanligini bila turib, undan foydalanish jinoyatlarini quyidagi holatlarda sodir etish yo‘liga kirgan.
“Sudlanuvchi Profelite IMP xususiy bandlik agentligi mas’uliyati cheklangan jamiyatlarni tashkil qilgan. Ishga joylashish bo‘yicha murojaat qilib kelgan fuqarolarga Koreya, Polsha va boshqa davlatlarga ishga yuborish haqidagi va’dalar berib, xorijiy davlat korxonalari bilan tuzilgan O‘zbekiston fuqarolarini ishga joylashtirish va xizmat ko‘rsatish haqidagi soxta shartnomalarni ko‘rsatish orqali fuqarolarning ishonchiga kirgan. Ammo amalda biror-bir fuqaroni ishga jo‘natishni maqsad qilmasdan, har bir fuqarodan taklif etilgan davlatdagi ishdan kelib chiqqan holda 32 million so‘mdan 50 million so‘mgacha bo‘lgan miqdorda pul mablag‘larini agentlikning bank hisob raqamiga kirim qilish va kirim qilmaslik yo‘li bilan qo‘lga kiritgan.
Ushbu fuqarolarni hech qayerga ishga yubormasdan, ularni huquqni muhofaza qiluvchi organlarga murojaat qilishining oldini olish va vaqtni cho‘zish uchun fuqarolardan o‘zlashtirilgan pullar evaziga vujudga kelgan majburiyatlarni keyingi tashkil etilgan xususiy bandlik agentligi orqali hal qilishga ishontirib kelgan.
Jinoyat natijasida jami 300 nafar jabrlanuvchiga 974 million so‘m miqdorida zarar yetkazilgan”, – deyiladi sud axborotida.
Tergov departamentining qo‘shimcha qilishicha, ayblanuvchi Ibrohim Jonuzoqovga nisbatan xalqaro qidiruv e’lon qilingan bo‘lib, keng qamrovli surishtiruv ishlari olib borilmoqda.
Izoh (0)