Тошкент шаҳри Аҳмад Дониш кўчасида ерусти пиёдалар ўтиш кўприги қурилиши бошлангани сабабли 11 мартдан кўчанинг бир қисмида қурилиш ва таъмирлаш ишлари олиб борилади. Бу ҳақда шаҳар ҳокимлиги хабар қилди.
Қайд этилишича, Аҳмад Дониш кўчасининг Гулғунча (Ашурова) кўчаси билан кесишмасидан бошлаб, қатнов қисмининг бир тарафи ҳар икки томондан транспорт учун ёпилади. Ишлар 15 мартгача давом этади.
Аввалроқ Тошкент шаҳрининг Абдулла Қодирий кўчасида жойлашган туннелда таъмирлаш ишлари олиб борилиши сабаб ҳаракат вақтинча чекланиши хабар қилинганди. 11 февралдан бошлаб бир ой давомида кўчадан ўтган туннелда реконструкция ишлари олиб борилади.
Шунингдек, Тошкент шаҳри Яшнобод туманининг Ўш кўчаси бўйлаб Қорасув канали устидан ўтувчи автомобиль йўли кўприги реконструкция қилинади. Шу сабабли Ўш кўчаси «Дўстлик» маданият ва истироҳат боғи кўприги билан кесишмасидан Бойсун кўчаси кесишмасигача ва ундан Ўш 1-тор кўчаси кесишмасигача бўлган оралиқ 2022 йилнинг 11 февралидан март ойи охиригача автомобиллар ҳаракати учун ёпилади.
Изоҳ (0)