Қамчиқ довонидан ўтган автомобиль йўлининг 236—241=километрлари оралиғида (икки туннел оралиғи) майдалаб қор ёғмоқда. Бу ҳақда йўл ҳаракати хавфсизлиги хизмати хабар қилди.
Қайд этилишича, йўлни қордан тозалаш ишлари махсус техникалар ёрдамида олиб борилмоқда.
«Барча ҳайдовчилардан об-ҳаво шароитини инобатга олган ҳолда, тезликни меъёрдан оширмасдан, оралиқ масофани сақлаб ҳаракатланишларини сўраймиз», — дейилади хабарда.
Аввалроқ «Ўзгидромет» республика бўйича вақти-вақти билан ёмғир ёғиши билан кузатиладиган беқарор об-ҳаво кейинги ҳафтанинг биринчи ярмигача сақланиб туришини маълум қилганди. Қайд этилишича, дам олиш кунлари республика ҳудудининг катта қисмида ёмғир ёғади, баъзи жойларда кучли бўлади, момақалдироқ бўлиши мумкин. Фақат Қорақалпоғистонда ва Хоразм вилояти айрим ҳудудларида ёғингарчилик камроқ бўлади.
Эслатиб ўтамиз, Ўзбекистон ҳудудига 10—16 март кунлари Эрондан илиқ ва нам ҳаво, сўнгра Кавказ ҳудудларидан нисбатан салқин ҳаво массаси кириб келиши кутилмоқда. 11—16 мартда республика ҳудудининг катта қисмида вақти-вақти билан ёмғир ёғади, момақалдироқ бўлиши мумкин. Шунингдек, 11—13 март кунлари А-373 Тошкент—Ўш автойўлининг Қамчиқ довони ҳудудида вақти-вақти билан кучли ёғингарчилик, туман кузатилиши, кўринувчанлик 50 метргача пасайиши, шамол тезлиги 20—23 м/с гача кучайиши, автойўлда қор уюмлари юзага келиши мумкин.
«Ўзгидромет» 11—15 март кунлари кутилаётган кучли ёмғирлар ёғиши сабабли республиканинг тоғолди ва тоғли ҳудудларида сел хавфидан огоҳлантирди. Республиканинг тоғолди ва тоғли ҳудудларида сел хавфи март ойи бошидан буён сақланиб қолмоқда. «Ўзгидромет» беқарор об-ҳаво иш ҳафтасининг охиригача сақланиб туришини прогноз қилган.
Изоҳ (0)