Toshkentdagi Ahmad Donish ko‘chasida piyodalar uchun ko‘prik qurilishi sabab yo‘lning bir qismi transportlar uchun yopiladi

Toshkent shahri Ahmad Donish ko‘chasida yerusti piyodalar o‘tish ko‘prigi qurilishi boshlangani sababli 11-martdan ko‘chaning bir qismida qurilish va ta’mirlash ishlari olib boriladi. Bu haqda shahar hokimligi xabar qildi.

Qayd etilishicha, Ahmad Donish ko‘chasining Gulg‘uncha (Ashurova) ko‘chasi bilan kesishmasidan boshlab, qatnov qismining bir tarafi har ikki tomondan transport uchun yopiladi. Ishlar 15-martgacha davom etadi.

Avvalroq Toshkent shahrining Abdulla Qodiriy ko‘chasida joylashgan tunnelda ta’mirlash ishlari olib borilishi sabab harakat vaqtincha cheklanishi xabar qilingandi. 11-fevraldan boshlab bir oy davomida ko‘chadan o‘tgan tunnelda rekonstruksiya ishlari olib boriladi.

Shuningdek, Toshkent shahri Yashnobod tumanining O‘sh ko‘chasi bo‘ylab Qorasuv kanali ustidan o‘tuvchi avtomobil yo‘li ko‘prigi rekonstruksiya qilinadi. Shu sababli O‘sh ko‘chasi “Do‘stlik” madaniyat va istirohat bog‘i ko‘prigi bilan kesishmasidan Boysun ko‘chasi kesishmasigacha va undan O‘sh 1-tor ko‘chasi kesishmasigacha bo‘lgan oraliq 2022-yilning 11-fevralidan mart oyi oxirigacha avtomobillar harakati uchun yopiladi.